Турк улсад болсон “Tour of Sakarya” олон өдрийн уралдаанд 18 орны 13 багийн 78 тамирчин дөрвөн өдрийн турш 525 км зам туулж, аваргаа шалгарууллаа. Өнгөрсөн амралтын өдөр өндөрлөсөн уг уралдаанд Малайзын мэргэжлийн дугуйн “Тerengganu” багийн тамирчин, ОУХМ С.Жамбалжамц хурд сорив. Тэрбээр 105 км-ийн зайд тэргүүлж, улбар шар цамц өмссөн байна. Мөн дундын болон шилдэг бариачны ногоон, уулын дугуйчны улаан цамцны эзнээр тодров. Өөрөөр хэлбэл, уралдааны бүх цамцыг өмсөж, үнэмлэхүй амжилт үзүүлэв. Ташрамд дуулгахад, Гавьяат дасгалжуулагч Я.Баатараар ахлуулсан өсвөрийн шигшээ багийн тамирчид БНСУ-д эхэлсэн “Tour de DMZ” олон улсын олон өдрийн тэмцээнд өрсөлдөж байна. Нөгөөдөр өндөрлөх тэмцээний дараа тэд ирэх сард Австралид болох өсвөр үе, залуучуудын дэлхийн аваргад оролцох юм.
