BBC агентлаг жил бүр дэлхийн дуучинг тодруулах "Cardiff singer of world" уралдаан зохион байгуулдгийг Монголын үзэгчид хэдийнэ мэддэг болсон билээ. Өнгөрсөн жил Гавьяат жүжигчин Э.Амартүвшин дэлхийн шилдгүүдийн дунд алдраа дуудуулж, үзэгчдийн нэрэмжит шагналыг хүртэж байсан. Тэгвэл энэ жил Гавьяат жүжигчин Г.Ариунбаатар, ДБЭТ-ын гоцлооч Б.Батжаргал нар дэлхийн шилдэг 20 дуучны нэгд зүй ёсоор багтаж, өчигдөр Гавьяат жүжигчин Г.Ариунбаатар эхний уралдаандаа түрүүллээ.
Энэ сарын 11-18-нд болж буй Дэлхийн дуучин шалгаруулах уралдааны романс төрлийн шилдэг дуулаачаар тэрбээр тодорч, өнөө өглөө цомоо гардан авлаа. Тэрбээр "BBC Cardiff Singer of the World 2017 тэмцээний Романсын төрөлд Тэргүүн байр эзэллээ. Энэхүү финалыг би Б.Шарав багшийн "Монголын тал нутаг" дуугаар хаасан юм. Энэхүү дууны аялгууг шагшин магтаж, BBC телевизийн хөтлөгч сэтгэл нь хөдлөн нулимс дуслуулж байхыг харах сайхан байлаа. Маргааш сүүлийн Финалтай! Хичээнээ. Монгол сонгодог" хэмээн олон нийтин сүлжээнд сэтгэгдлээ үлдээж баяр бахдалаа хуваалцсан байлаа.
