Ираны нефтийг Сирид нийлүүлсэн хэмээн АНУ зургаан хүн, гурван байгууллага, тэдний дотор Оросын КГК буюу “Global vision group”, “Промсырьеимпорт” гэсэн хоёр компанид хориг арга хэмжээ авчээ. АНУ-ын Сангийн яамны Гадаадын хөрөнгөд хяналт тавих газраас ийн мэдээлэв. Иран, Оросын сүлжээний ачаар Сирийн Засгийн газар Иранаас олон сая баррель нефть авч байгаа бол тус улсын Хувьсгалыг хамгаалагчдын корпусаас гадна ХАМАС, “Хезболлах” хөдөлгөөн Сириэс хэдэн зуун сая долларын санхүүжилт авч буй гэнэ. Сирид нууцаар нефть нийлүүлдгээ мэдэгдэхгүйн тулд байршил тогтоогчид “баригдахгүй” хөлөг онгоцуудаар тээвэрлэдэг аж.
Сирид нефть нийлүүлэхийг дэмжихийн тулд Ираны Төвбанк Орост их хэмжээний мөнгө шилжүүлэхэд оролцсон байна. Үүний тулд Иран эм бэлдмэл зэрэг хүмүүнлэгийн хэрэгцээт бараа худалдах чиглэлээр үйл ажиллагаа явуулдаг компаниудыг ашигладаг гэнэ. Үүнээс гадна, АНУ-ын Сангийн яам 16 хөлөг онгоцны жагсаалт нийтэлсний дөрөв нь Оросынх байна. Эдгээр хөлөг онгоц 2016-2018 онд Ираны нефтийг Сирид нийлүүлэхэд оролцсон гэж АНУ-ын эрх баригчид үзэж байгаа юм. Ираны цөмийн хөтөлбөрийн тухай гэрээнээс АНУ гарч буйг тус улсын Ерөнхийлөгч Дональд Трамп өнгөрсөн тавдугаар сард мэдэгдсэн. Тэрбээр Тегеранд авсан бүх хориг, мөн хоёрдогч буюу Ирантай хамтран бизнес явуулдаг бусад оронд тавьсан хязгаарыг сэргээсэн юм. Ираны эсрэг хоригийн эхний хэсгийг өнгөрсөн наймдугаар сарын 7-нд сэргээсэн нь тус улсын нефтийн экспортыг тэглэх зорилготойг Вашингтон мэдэгдээд, худалдаж авахгүй байхыг уриалсан билээ. Ираны нефтийн экспортын талаарх АНУ-ын нэмэлт хориг арга хэмжээ энэ сарын 5-наас хэрэгжиж эхэлсэн. Гэхдээ Хятад, Энэтхэг, Итали, Грек, Япон, БНСУ, Тайвань, Туркийг уг арга хэмжээнээс АНУ түр хассан байна.
