“Улаанбаатарын өвлийн наадам”-ыг энэ сарын27-28-нд “Скай ресорт” цанын бааз болон“Уухайн дуу” жуулчны бааз, Үндэсний цэцэрлэгт хүрээлэнд зохион байгуулах нь. Монгол орныхоо үзэсгэлэнт өвлийн улирал, ёс заншил, өв уламжлал, дахин давтагдашгүй өвөрмөц соёлыг сурталчлан таниулах нь эл наадмын зорилго аж. Өвлийн улирлын экстрим спортын тэмцээнүүд болон амралтын өдрүүдийг гэр бүлээрээ аз жаргалтай өнгөрүүлэх боломжийг олгоход чиглэсэн арга хэмжээнүүдийг наадмын хөтөлбөрт багтаасан байна. “Улаанбаатарын өвлийн наадам”-ыг нийслэлийн Аялал жуулчлалын газар, “Скай ресорт” хамтран зохион байгуулах юм.
Наадмын хүрээнд монгол туургатны мөсөн сурын, шагайн аваргыг шалгаруулах нь. Мөн снөү боардын, мөсөн хананд авиралтын сонирхогчийн тэмцээн ч болох гэнэ. Түүнчлэн гэр бүлээрээ оролцох боломжтой буухиа, олс таталтын тэмцээн зэргийг зохион байгуулахаар төлөвлөжээ. Хүрэлцэн ирсэн иргэддээ зориулан шүхрийн, шувуулахуйн үзүүлбэр болон снөү боардын үзүүлэх тоглолтыг сонирхуулах юм байна. “Улаанбаатарын өвлийн наадам”-д манай улсаас 1000 гаруй тамирчид оролцох гэнэ. Мөн БНХАУ-ын Өвөр Монгол, Шинжаан-Уйгур, ОХУ-ын Буриадаас 80 гаруй оролцогч ирэх аж.
Бэлтгэсэн А.Үүлэн
