Дэлхийн цаг уурын байгууллага (WMO) ээлжит “улаан дохио”-гоо дуугаргахаас аргагүй байдалд хүрээд буйгаа албан ёсоор зарлалаа. Тус байгууллагаас мэдээлснээр 2024 он дэлхийн түүхэн дэх буюу цаг агаар, уур амьсгалын өөрчлөлтийг хэмжиж эхэлсэн, аж үйлдвэржилтийн өмнөх 1850-иад оны үеэс хойших хамгийн халуун жил болох өндөр магадлалтай гэнэ. Өнгөрсөн онд агаарын дундаж температур аж үйлдвэржилтийн өмнөх үеийнхээс 1.45 (+0.2) хэмээр нэмэгдсэн нь түүхэн дээд үзүүлэлт болсон билээ. Тэгвэл өнөө жил энэ үзүүлэлт 1.5 хэмийн босгыг давж, цаг уурын түүхэнд шинэ амжилт тогтоох магадлалтай гэж судлаачид үзэж байна.
1940 оноос хойших хамгийн халуун өдөр, дараалсан сар энэ оны зун тохиосныг Дэлхийн цаг уурын байгууллагаас мэдээлсэн. Мөн бүх төрлийн чулуужсан түлшнээс үүдэлтэй нүүрсхүчлийн хийн ялгарал, ус, цаг уурын үзэгдлээс улбаатай гамшгийн нөлөө, хохирлын хэмжээ өнөө жил түүхэн дээд цэгтээ хүрснийг ч тус байгууллагаас зарлалаа. Дэлхий дахин дахь нийт ажиллах хүчний 70 гаруй хувь буюу 2.4 тэрбум хүн уур амьсгалын хямрал, хэт халуунд өртөх эрсдэлд амьдарч байгааг судлаачид дурдав. Байгаль, цаг ууртай холбоотой аливаа эрсдэлд нийгмийн эмзэг бүлгийн иргэд хамгийн ихээр өртөж, хохирдгийг анхаарууллаа.
Одоогийн байдлаар нийт улсын 55 хувь буюу 108 орон цаг агаар, уур амьсгалын аюултай үзэгдлээс сэргийлэх системийг нутагшуулаад буй нь хангалтгүй үзүүлэлт гэдгийг Дэлхийн цаг уурын байгууллагаас мэдэгдэв. НҮБ 2027 он гэхэд бүх улсыг үүнд холбох “Бүгдэд зориулсан эрт сэрэмжлүүлэх систем” санаачилга гаргасан ч энэ ажлыг эрчимжүүлэх, цаг агаарын эрс тэс нөхцөл, хэт халуунд дасан зохицох, тэсвэрлэх чадварыг сайжруулах шаардлага тулгарсныг ч дээрх байгууллагаас анхаарууллаа.
