Өнөөдөр гадаа 24 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Тавдугаар сарын 27-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 148 дахь өдөр бөгөөд он дуусахад 218 хоног үлдлээ.
- Цаг агаар өдөртөө 24 хэмийн дулаан бол шөнөдөө 11 градус дулаан байх нь ээ.
- Билгийн тооллын 19, Элдэв тэнгэртэн одтой, цагаагчин туулай өдөр. Өдрийн наран мандах, жаргах цаг нь 5:01-20:38. Тухайн өдөр хонь, гахай жилтнээ аливаа үйлийг хийхэд эерэг. Эл өдөр эе, эвээ ололцох, хамтын хөдөлмөр эхлэх, гэрээ хэлцэл байгуулах, найр хурим хийх, бэр гуйх, инж өгөх, авах, үнэт эрдэнийн зүйл авах, гарагийг тахих, мал аж ахуйн үйл, удирдлагын суудалд суух, огторгуйн үүдийг боох, их хүмүүнтэй уулзахад сайн. Газар хагалах, ус булгийн эх малтах, улаа гаргах, хиншүү хярвас гаргах, балгадын суурь тавих, нохой худалдан авахад муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод зүүн хойш мөрөө гаргавал зохистой. Үс шинээр үргээлгэх буюу засуулбал “Сайн нөхөртэй учирах” хэмээх сайн.
- Валют арилжааны төвд ам.долларын авах ханш 3397.00 төгрөг, зарах нь 3402.00 төгрөг байна. Харин рублийн авах ханш 38.00, зарах ханш 38.40, юанийн авах ханш 468.00, зарах ханш 469.50, вонийн авах ханш 2.42, зарах ханш 2.45 төгрөг байна.
Өнөөдөр болох онцлох үйл явдлууд:
- 10.00-17.00 цагт Д.Сүхбаатарын талбайд: Өмгөөлөгчдийн холбоо, нийслэлийн ЗДТГ хууль эрх зүйн "Танд тусалъя 2024” өдөрлөг зохион байгуулна.
- 11.40 цагт Монгол Улсын Үндэсний номын сангийн шинэ барилгын нээлтийн ёслол болно. Утас: 8010-4037.
- 14.00 цагт Улаанбаатар дахь Русский дом (РЦНК)-д: Халх голын ялалтын 85 жилийн ойн хүрээнд ОХУ-аас манай улсад ирээд буй “Халхын гол: Бидний алдар нэр-2024” олон улсын экспедицийн уулзалт болно.
Энэ өдөр дэлхийн түүхэнд:
- 1153 - Шотландын хаан ширээнд IV Малколм суужээ.
- 1199 - Английн хаан ширээнд Жон суув.
- 1644 - Манжийн ханхүү Дөргөнөөр удирдуулсан арми Шун гүрний хаан Ли Зичений цэргүүдийг Шанхайн тулаанд бут цохив. Ингэснээр Манжууд нийслэл Бээжин хотноо саадгүй нэвтэрсэн билээ.
- 1703 - Оросын их хээн Петер өнөөгийн Санкт Петербург хотыг үндэслэн байгуулав.
- 1799 - Швейцарийн Винтертур хотод Австрийн цэргийн хүч Францад ялагдал хүлээжээ.
- 1813 - 1812 оны дайн: Канад-Америкийн хамтарсан цэргийн хүч Жорж боомтыг эзлэн авав.
- 1863 - Америкийн иргэний дайн: Эх газрын арми Хадсон боомтын бүслэлтийн эхний чухал дайралтаа эхлүүлэв.
- 1883 - Оросын хаан ширээнд III Александр суужээ.
- 1896 - Иллиной болон Миссури мужид F4 зэрэглэлийн хүчтэй шуурга шуурч 255 хүн амиа алдсан байна. Тухайн үед уг шуурга 2.9 тэрбум ам.долларын эдийн засгийн хохирол учруулсан юм.
- 1905 - Орос-Японы дайн: Цүшимагийн тулаан эхэлжээ.
- 1919 - NC-4 загварын нисэх онгоц анх удаагаа Атлантын далайг дамнасан нислэг үйлдэв.
- 1927 - "Форд Мотор" компани "Т" загвараа шинэчлэн сайжруулж, А загвараа үйлдвэрлэж эхлэв.
