Өнөөдөр гадаа 14 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Тавдугаар сарын 24-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 144 дахь өдөр бөгөөд он дуусахад 221 хоног үлдлээ.
- Цаг агаар өдөртөө 14 хэмийн дулаан бол шөнөдөө 5 градус дулаан байх нь ээ.
- Билгийн тооллын 16, Эрхтэний тэнгэрт одтой, шар хулгана өдөр. Сугар гараг. Өдрийн наран 5 цаг 03 минутад мандан, 20 цаг 35 минутад жаргана. Тухайн өдөр луу, бич жилтнээ аливаа үйлийг хийхэд эерэг сайн ба бар туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, гарагийг тахих, хагалгаа хийлгэх, буг дарах, газрын ам бооход сайн. Улаа гаргах, хиншүү хярвас гаргах, мод суулгах, нарийн зөвлөгөөн хийх, байшингийн суурь тавих, угаал үйлдэхэд муу. Өдрийн сайн цаг нь бар, луу, могой, бич, тахиа, гахай болой. Хол газар яваар одогсод баруун хойд зүгт мөрөө гаргавал зохистой. Үс шинээр үргээлгэх буюу засуулахад тохиромжгүй.
- Валют арилжааны төвд ам.долларын авах ханш 3374.00 төгрөг, зарах нь 3396.00 төгрөг байна. Харин рублийн авах ханш 38.00, зарах ханш 38.40, юанийн авах ханш 468.00, зарах ханш 469.50, вонийн авах ханш 2.42, зарах ханш 2.45 төгрөг байна.
Өнөөдөр болох онцлох үйл явдлууд:
- 09.00 цагаас Сонгуулий ерөнхий хороо, Харилцаа холбооны зохицуулах хороо, ЦЕГ, ХЭҮК хамтарч сонгуулийн үеийн хүний эрхийн зөрчил, сонгуулийн үед хэвлэл мэдээллийн байгууллагын сурталчилгааны шинэ журам сэдвүүдээр сургалт хийнэ.
Энэ өдөр дэлхийн түүхэнд:
- 1626 онд Одоогийн АНУ-ын Манхеттэн дүүргийг Бельгийн худалдаачин Петер Минуит худалдан авчээ.
- 1683 онд Английн алдарт Оксфордын их сургуулийн дэргэд Ашмолинийн музей байгуулагдав. Энэ нь дэлхийд анх удаа их сургуулийн дэргэд их сургууль байгуулагдсан тохиолдол болсон билээ.
- 1830 онд Англи хэлт орнуудад түгэн тархсан хүүхдийн хамгийн алдартай дуу болох "Мери бяцхан хургатай" дууны үгийг Сара Жозефа Хейл зохиожээ.
- 1844 онд Морзийн кодыг зохион бүтээсэн Самүэл Морз АНУ-ын Капитолын ордны мэргэжилтэн Альфред Вейл рүү Библи судрын 23.23 мөртийг явуулав. Энэ нь цахилгаан мэдээний анхдагч байсан юм.
- 1856 онд Боолчлолын эсрэг тэмцэл өдүүлж, хар арьстнуудын эрхийг хамгаалах талаар үгээ хэлж байсан Америкийн тэмцэгч Жон Брауны талынхан боолчлолыг дэмждэг таван хүний амь насыг хороожээ.
- 1883 онд Нью-Йорк хотын алдарт Брүүклиний гүүр 14 жилийн барилгын ажлын дараа албан ёсоор нээжээ.
- 1930 онд Английн эмэгтэй нисгэгч Эми Жонсон Австралийн Умардын газар нутгийн Дарвин хотод газардав. Тэрээр Англиас-Австрали хүртэл ганцаар ниссэн анхны эмэгтэй нисгэгч болсон билээ.
- 1940 онд Зөвлөлтийн нэрт онгоц зохион бүтээгч Игорь Сикорский нэг хөдөлгүүрт нисдэг тэргээ амжилттай туршив.
- 1962 онд Меркюри сансрын хөтөлбөр: Америкийн сансрын нисэгч Скотт Карпентер "Аврора 7" хөлгөөр дэлхийг гурван удаа тойров.
- 1976 онд Францын нийслэл Парис хотод АНУ-ын Калифорни мужид үйлдвэрлэгдсэн дарсны чанарыг шалгаж байхаар болов.
