Өнөөдөр гадаа 22 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Тавдугаар сарын 15-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 136 дахь өдөр бөгөөд он дуусахад 230 хоног үлдлээ.
- Цаг агаар өдөртөө 22 хэмийн дулаан бол шөнөдөө 5 хэмийн дулаан байх нь ээ.
- Билгийн тооллын давхарласан 7, Үнэг одтой, шарагчин туулай өдөр. Өдрийн наран мандах, жаргах цаг нь 5:13-20:24. Тухайн өдөр хонь, гахай жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, угаал үйлдэх, мал аж ахуйн үйл, удирдлагын суудалд суух, хийморийн дарцаг хатгахад сайн. Газар хагалах, ус булгийн эх малтах, уул овоо тахихад муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод урагш мөрөө гаргавал зохистой. Үс шинээр үргээлгэх буюу засуулахад тохиромжгүй. Тэрсүүд өдөр.
- Валют арилжааны төвд ам.долларын авах ханш 3391.00 төгрөг, зарах нь 3394.00 төгрөг байна. Харин рублийн авах ханш 36.20, зарах ханш 36.50, юанийн авах ханш 470.50, зарах ханш 471.50, вонийн авах ханш 2.48, зарах ханш 2.49 төгрөг байна.
Өнөөдөр болох онцлох үйл явдлууд:
- “Олон улсын гэр бүлийн өдөр”-ийг Монгол Улсад 2003 оны “Нийтээр тэмдэглэх баярын болон тэмдэглэлт өдрүүдийн тухай” хуулийн дагуу 21 дэх жилдээ тэмдэглэж байна.
- Монголын Аялал жуулчлалын холбооноос гишүүн байгууллагын хөтөч нарт зориулан музейн тайлбар хийх сургалт зохион байгуулна.
- 11:00 цагаас Зууны мэдээ сонины Үндэсний мэдээллийн төвд Бодит мэдээллийг хялбархнаар хүргэх "Асуу" чатбот ашиглалтад оруулсан талаар мэдээлэл хийнэ. Сэтгүүл зүйн Инновац Хөгжлийн Үүр төвийн дэргэдэх Монголын баримт шалгах төв болон хуурамч мэдээллийг бууруулах "Баримт нэн тэргүүнд" үндэсний сүлжээний гишүүн байгууллагуудын нийтлэл, нэвтрүүлэг, контентод дурдсан баримтаар шалгасан бодит зөв мэдээллийг нэг дороос авах боломжтой платформыг ашиглалтад оруулжээ.
- 11:30 цагаас Health transformation club Эрүүл мэндийн салбарын ажилтнуудтай хамтран Эрүүл мэндийн салбарын үйл ажиллагааны доголдол, хууль бус үйл ажиллагааг илчлэх "Эрүүл мэндийн салбарын дампуурал" сэдвээр хэвлэлийн бага хурал хийнэ.
- 12:00 цагаас Улсын Их Хурлаас баталсан Уламжлалт мал аж ахуйд тулгамдаж байгаа уур амьсгалын өөрчлөлтөөс шалтгаалсан сөрөг нөлөөллийг бууруулах тухай хууль нь Монгол Улсын Үндсэн хууль, Хууль дээдлэх нь төрийн үйл ажиллагааны үндсэн зарчмыг болон Монгол Улсын Их Хурлын төсөв батлах бүрэн эрхэд халдсан тухай Үндсэн хуулийн цэцэд хандаж байгаа иргэд мэдээлэл хийнэ.
Энэ өдөр дэлхийн түүхэнд:
- 1618 онд Немцийн суут одон орон судлаач Иоганн Кеплер Нарны аймгийн хөдөлгөөний тухай өөрийн гурван гол хуулийн сүүлчийнхийг нээжээ.
- 1930 онд Америкийн Айова мужийн эмнэлгийн сувилагч байсан Эллен Чёрч дэлхийн анхны онгоцны үйлчлэгч эмэгтэй болсон байна.
- 1956 онд өнгөрсөн зууны далаад оны үед бүжгэн жүжгийн тайзнаа олны шагшруулж байсан Оросын бүжигчин эмэгтэй Надежда Павлова төржээ.
- 1960 онд Америкийн Huges Aircraft компанийн судалгааны лабораторийн физикч эрдэмтэн 32 настай Теодор Мейман анх удаагаа лазерын туяа хэрхэн ажилладагийг нийтэд танилцуулжээ.
- 1993 онд Олон улсын гэр бүлийн өдрийг (International Family Day) НҮБ-ын Ерөнхий ассамблейгаас бий болгон гэр бүлийн асуудалд олон орны нийгмийн байгуулагуудын анхаарлыг хандуулах зорилго тавьжээ.
