Өнөөдөр гадаа 11 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Тавдугаар сарын 13-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 134 дэх өдөр бөгөөд он дуусахад 232 хоног үлдлээ.
- Цаг агаар өдөртөө 11 хэмийн дулаан бол шөнөдөө 2 хэмийн хүйтэн байх нь ээ.
- Билгийн тооллын 6, Найралт эх одтой, улаагчин үхэр өдөр. Өдрийн наран мандах, жаргах цаг нь 5:16-20:21. Тухайн өдөр тахиа, могой жилтнээ аливаа үйлийг хийхэд эерэг сайн. Эл өдөр элдэв үйлд хянуур хандах хэрэгтэй ба ан, гөрөө хийх, мал, адгуус муулах, лус тахих, мал арилжих, гэр бүрэхэд сайн. Цөөрөм байгуулахад муу. Өдрийн сайн цаг нь бар, туулай, могой, бич, нохой, гахай болой. Хол газар яваар одогсод баруун хойш мөрөө гаргавал зохистой. Үс шинээр үргээлгэх буюу засуулбал өнгө зүс сайжирна
- Валют арилжааны төвд ам.долларын авах ханш 3386.00 төгрөг, зарах нь 3391.00 төгрөг байна. Харин рублийн авах ханш 35.50, зарах ханш 36.00, юанийн авах ханш 468.00, зарах ханш 469.50, вонийн авах ханш 2.42, зарах ханш 2.45 төгрөг байна.
Өнөөдөр болох онцлох үйл явдлууд:
- 10.00 цагт: Олон улсын сувилагчдын өдөрт зориулсан “СУВИЛАГЧ ТАНААРАА БАХАРХЪЯ” арга хэмжээ “UG arena” цогцолборт болно.
- 11.00 цагт: Төрд хаягдсан иргэд тэмцлийн хурц хэлбэрт шилжиж буй талаар Үндэсний мэдээллийн төвд мэдээлэл хийнэ.
- 11.30 цагт: УИХ-ын сонгуулийн хууль гадаадад суугаа 200 гаруй мянган иргэний Үндсэн хуулийн тэгш сонгох эрхийг зөрчиж буй талаар "Хилийн чанад дахь монголчуудын зөвлөл" болон "Цахим Өртөө холбоо" ТББ Цэцэд хандаж Үндэсний мэдээллийн төвд мэдээлэл хийнэ.
- 12.00 цагт: СХД-т дахин төлөвлөлтөд хамрагдах нэрийдлээр "МОНТАЙ БҮРД" ХХК-ийн “Хөх дэгд” хотхонд байр захиалаад луйвардуулж орон гэргүй болсон иргэд өлсгөлөн зарлаад байгаа талаар мэдээлнэ.
- 14.00 цагт: “Улаанбаатар” их сургуульд: "МОНГОЛ ГЭР БҮЛИЙН ӨНӨӨГИЙН НӨХЦӨЛ БАЙДАЛ, ТУЛГАМДАЖ БУЙ АСУУДАЛ, ХУВЬСАЛ ӨӨРЧЛӨЛТИЙН ШАЛТГААН" эрдэм шинжилгээнийхурал болно.
Энэ өдөр дэлхийн түүхэнд:
- 1998 онд Индонези дэх хятад гаралтай иргэд Жакарта хотод эсэргүүцлийн жагсаал зохион байгуулав. Хятад гаралтай иргэдийн амь насанд халдах, эмэгтэйчүүдийг хүчирхийлэх хэрэг удаа дараа гарах болсонд ийнхүү эсэргүүцжээ.
- 2005 онд Узбекистаны Андижан дахь шоронд хоригдлууд бослого дэгдээв. Узбекийн арми цэргийн ажиллагаа явуулж бослого дэгдээсэн 187 хүнийг хороосон байна.
- 2011 онд Пакистан улсын Чарсадда дүүрэгт хоёр ч удаа бөмбөг дэлбэрч 98 хүн амиа алдаж, 140 хүн шархаджээ.
- 2012 онд Мексикийн холбооны 40 дэх хурдны замаас хэн болох нь үл мэдэгдэх 49 хүний цогцос илэрчээ.
- 2014 онд Туркийн баруун-өмнөд хэсэгт орших нүүрсний уурхайд осол болж, 301 уурхайчин амиа алдав.
- 2018 онд Индонезийн Сурабаягийн сүмд амиа золиослогч бөмбөг дэлбэлж, есөн хүн амиа алдан, гурван хүн шархдав.
