Өнөөдөр гадаа -12 градусын хүйтэн байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Нэгдүгээр сарын 25-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 25 дахь өдөр бөгөөд он дуусахад 340 хоног үлдлээ.
- Цаг агаар өдөртөө -12 хэмийн хүйтэн бол шөнөдөө -19 градус хүйтэн байх нь ээ.
- Билгийн тооллын 7, Дэлгэрүүлэгч одтой, цагаан луу өдөр. Буд гараг. Өдрийн наран 8 цаг 36 минутад мандан, 17 цаг 18 минутад жаргана. Тухайн өдөр хулгана, бич жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, лус тахих, бороо хур оруулах, зэтгэрийг номхотгох, хөгжмийн зэмсэг урлахад сайн. Гүүр тавих, газар ухах, цөөрөм ухахад муу. Өдрийн сайн цаг нь бар, туулай, могой, бич, тахиа, гахай болой. Хол газар яваар одогсод хойш мөрөө гаргавал зохистой. Үс шинээр үргээлгэх буюу засуулахад тохиромжгүй.
- Валют арилжааны төвд ам.долларын авах ханш 3400.00 төгрөг, зарах нь 3420.00 төгрөг байна. Харин рублийн авах ханш 37.00, зарах ханш 37.60, юанийн авах ханш 471.50, зарах ханш 476.10, вонийн авах ханш 2.51, зарах ханш 2.64 төгрөг байна.
Өнөөдөр болох онцлох үйл явдлууд:
- 09.00 цагаас Төрийн ордонд Засгийн газар хуралдана.
- 11.00-15.00 цагаас Хэвлэлийн хүрээлэнгийн мэдээллийн төвд Хэвлэл мэдээллийн удирдах ажилтнуудын уулзалт болно. Энэ уулзалтаар Монголын хэвлэл мэдээллийн салбар цахим орчинд хэрхэн өөрчлөгдөж, ямар бэрхшээлтэй тулгарч буйг хэлэлцэж, олон улсын чиг хандлагын талаар санал солилцоно.
- 11.30 цагаас Зууны мэдээ үндэсний мэдээллийн төвд БЗД-ийн 14 дүгээр сургуулийн дэргэд байрладаг “Шунхлай” ШТС-ын үйл ажиллагааг зогсоохыг шаардаж багш, ажилчид, хүүхдүүд, эцэг эхчүүд, оршин суугчдын төлөөлөл мэдээлэл хийнэ.
Энэ өдөр дэлхийн түүхэнд:
- 1554 онд Бразилын Сан Паулу хот байгуулагдав.
- 1575 онд Португалын нэрт аялагч Паулу Диас де Новайс одоогийн Ангол улсын нийслэл Луанда хотыг байгуулжээ.
- 1755 онд Москвагийн их сургууль байгуулагдав.
- 1771 онд Оросын их хатан хаан II Екатерина Халимаг Монголчуудыг өөрийн газар нутаг гэх зарлиг гаргасан боловч Халимаг Монголчууд хэдийнэ нутагаа орхин гарсан байжээ.
- 1858 онд Их Британийн хатан хаан Викториагийн охин, гүнж Викториа болон Пруссийн Фридрих нарын хуримын үеэр Феликс Менделссоны Хуримын марш анх удаа эгшиглэсэн.
- 1881 онд Алдарт зохион бүтээгчид болох Томас Эдисон, Александр Грэхэм Белл хамтарч "Oriental Telephone" компанийг байгуулжээ.
- 1890 онд Америкийн эмэгтэй аялагч Нелли Блай дэлхийг 72 хоног тойрч, эх нутагтаа иржээ.
- 1918 онд Украин улс Оросын Болщевикуудаас тусгаар тогтнолоо зарлав.
- 1924 онд Францын Альпын нуруунд орших Шамони хотод Өвлийн олимп ёслол төгөлдөр нээлтээ хийв. Ийнхүү өвлийн спортын анхны олимп Франц улсад нээгдсэн юм.
- 1947 онд Зохион бүтээгч Томас Голдсмит "Катодын туяа бүхий дөрвөлж"-ийг патентжуулснаар, хамгийн анхны "компьютер" тоглоом зохион бүтээгдсэн юм.
