Өнөөдөр гадаа -15 градусын хүйтэн байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Нэгдүгээр сарын 19-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 19 дахь өдөр бөгөөд он дуусахад 346 хоног үлдлээ.
- Цаг агаар өдөртөө -13 хэмийн хүйтэн бол шөнөдөө -19 градус хүйтэн байх нь ээ.
- Билгийн тооллын 7, Дэлгэрүүлэгч одтой, цагаан луу өдөр. Буд гараг. Өдрийн наран 8 цаг 36 минутад мандан, 17 цаг 18 минутад жаргана. Тухайн өдөр хулгана, бич жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, лус тахих, бороо хур оруулах, зэтгэрийг номхотгох, хөгжмийн зэмсэг урлахад сайн. Гүүр тавих, газар ухах, цөөрөм ухахад муу. Өдрийн сайн цаг нь бар, туулай, могой, бич, тахиа, гахай болой. Хол газар яваар одогсод хойш мөрөө гаргавал зохистой. Үс шинээр үргээлгэх буюу засуулахад тохиромжгүй.
- Валют арилжааны төвд ам.долларын авах ханш 3400.00 төгрөг, зарах нь 3420.00 төгрөг байна. Харин рублийн авах ханш 37.00, зарах ханш 37.60, юанийн авах ханш 471.50, зарах ханш 476.10, вонийн авах ханш 2.51, зарах ханш 2.64 төгрөг байна.
Өнөөдөр болох онцлох үйл явдлууд:
- 09.00 цагт: “Холидэй Инн” зочид буудалд: Тэгш хамран сургах боловсролын туршлага хуваалцах семинар болно.
- 11.30 цагт: “ЗМ”-ний мэдээллийн төвд: Архангай аймгийн ИТХ-ын дарга хууль зөрчсөн үйл ажиллагаа явуулж байгаа талаар аймгийн хурлын төлөөлөгч Ц.Амаржаргал хэвлэлийн бага хурал зарлажээ.
- 12.00 цагт: Нийслэлд Нарны хорооллын гүүрэн гарцыг албан ёсоор нээнэ.
- 14.00-18.00 цагт: “Туушин” зочид буудалд: Хөрөнгийн зах зээлийн трендийг тодорхойлох "Top Traders & Investors" үйл ажиллагаа болно
Энэ өдөр дэлхийн түүхэнд:
- 1607 онд Филиппиний хамгийн хуучны сүм болох Сан Агустиний сүм Манила хотноо баригдаж дуусжээ.
- 1795 онд Нидерландын харьяанд байсан Батавиа аймаг тусгаар тогтнолоо зарлаж Бүгд найрамдах Батавиа улс болов. Ингэснээр Нидерландын нэгдсэн долоон мужийн засаглал нуран унасан юм.
- 1829 онд Германы нэрт зохиолч, философич Йохан Вольфганг фон Гётегийн "Фауст" жүжгийн эхний бүлгийг анх удаа тайзнаа тавив.
- 1899 онд Африкийн Судан улсыг Англи, Египет хамтран захирч байхаар байгуулжээ.
- 1915 онд Хэзээ ч шатахгүй, дахин цэнэглэхгүй гэрлийн чийдэнг Жиоржес Клауд зохион бүтээж, патентаа авав.
- 1949 онд Куба улс Израйль улсыг албан ёсоор хүлээн зөвшөөрчээ.
- 1969 онд Жилийн өмнө буюу 1968 онд ЗХУ Чехословакыг эзлэн түрэмгийлж, асуудалд хөндлөнгөөс оролцож байна гэж үзэн эсэргүүцлээ илэрхийлж, өөрийгөө Прага хотын төв талбайд шатаасан Йан Палачыг оршуулах ажиллагаа болов. Түүнийг оршуулах ажиллагааны үеэр олон нийтийг хамарсан томоохон эсэргүүцлийн хөдөлгөөн өрнөжээ
- 1978 онд Вольксваген компанийн "Цох" загварын машиныг хамгийн сүүлийн удаа Вольксвагены төв үйлдвэрт угсарчээ. Латин Америк дахь Вольксвагены салбар үйлдвэрүүд 2003 онд угсарч эхлэх хүртэл тус компани "Цох" загварыг дахиж угсраагүй юм.
