Өнөөдөр гадаа -7 градусын хүйтэн байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Арванхоёрдугаар сарын 28-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 362 дахь өдөр бөгөөд он дуусахад 3 хоног үлдлээ.
- Цаг агаар өдөртөө -7 хэмийн хүйтэн бол шөнөдөө -19 градус хүйтэн байх нь ээ.
- Билгийн тооллын 17, Өглөгт охин одтой, цагаан бич өдөр. Өдрийн наран 8 цаг 41 минутад мандан, 17 цаг 6 минутад жаргана. Тухайн өдөр хулгана жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр найз нөхдийг түшиж элдэв үйлийг түргэн бүтээх, бүтээл туурвил эхлэх, бизнэс эхлэх, цар ихтэй үйлийг эхлэх, бясалгал хийх, доодсыг асран өглөг, хандив өргөх, сүм дуганыг сэргээх, бүжиг наадам хийх, цэцэрлэг байгуулах, хур оруулах, дархны үйлд сайн. Хувцас эсгэх, шинэ хувцас өмсөх, зөвлөгөө хийх, гөлөг тэжээхэд муу. Өдрийн сайн цаг нь хулгана, үхэр, луу, могой, хонь, нохой болой. Хол газар яваар одогсод зүүн зүгт мөрөө гаргавал зохистой. Үс шинээр үргээлгэх буюу засуулахад тохиромжгүй.
- Валют арилжааны төвд ам.долларын авах ханш 3421.00 төгрөг, зарах нь 3425.00 төгрөг байна. Харин рублийн авах ханш 37.20, зарах ханш 37.60, юанийн авах ханш 478.00, зарах ханш 480.30, вонийн авах ханш 2.59, зарах ханш 2.62 төгрөг байна.
Өнөөдөр болох онцлох үйл явдлууд:
- 10.00 УИХ-ын нэгдсэн чуулган
- 10.00 “Халхын Цогт хунтайжийн хадны бичээс” Олон улсын баримтат өвийн жагсаалтад бүртгэсэн батламжийг гардуулах ёслол, хэлэлцүүлэг болно.
Энэ өдөр дэлхийн түүхэнд:
- 1810 онд Ирландын эрэг орчим Британийн “Элизабет” хөлөг онгоц далайн шуурганд сүйрч, 400 орчим далайчин амиа алдав.
- 1869 оны энэ өдөр АНУ-ын Охайо мужид Уильям Семпл зажилдаг бохийг анх удаа патентжуулжээ.
- 1895 онд Германы физикч Вилхельм Конрад Рёнтген рентгений туяаг нээсэн тухай анх удаа зарлаж байв.
- 1908 онд Италийн Сицилд газар хөдөлсний улмаас 75 мянга гаруй хүн амиа алдав.
- 2014 онд Яваны тэнгист Индонезийн иргэний агаарын тээврийн “Indonesia AirAsia” компанийн “Airbus A320” онгоц осолдож, 162 амиа алдав.
