Өнөөдөр гадаа 10 хэм дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Арваннэгдугаар сарын 10-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 314 дахь өдөр бөгөөд он дуусахад 51 хоног үлдлээ.
- Цаг агаар өдөртөө 10 хэмийн хүйтэн бол шөнөдөө 25 хэм хүйтэн байх нь ээ.
- Билгийн тооллын 27, Сугар гараг. Тугчин одтой, хар бич өдөр. Өдрийн наран 7 цаг 50 минутад мандан, 17 цаг 22 минутад жаргана. Тухайн өдөр хулгана, луу жилтнээ аливаа үйлийг хийхэд эерэг сайн ба бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, сан тавиулах, угаал үйлдэх, бүжиг наадам хийх, цэцэрлэг байгуулах, хур оруулах, дархны үйлд сайн. Хувцас эсгэх, шинэ хувцас өмсөх, зөвлөгөө хийх, сэтгэлд сэвтэй газар очиход муу. Өдрийн сайн цаг нь хулгана, үхэр, луу, могой, хонь, нохой болой. Хол газар яваар одогсод зүүн зүгт мөрөө гаргавал зохистой. Үс шинээр үргээлгэх буюу засуулбал өлзийтэй сайн.
- Валют арилжааны төвд ам.долларын авах ханш 3446.00 төгрөг, зарах нь 3450.00 төгрөг байна. Харин рублийн авах ханш 36.30, зарах ханш 36.70, юанийн авах ханш 476.00, зарах ханш 477.80, вонийн авах ханш 2.65, зарах ханш 2.67 төгрөг байна.
Өнөөдөр болох онцлох үйл явдлууд:
- 08.30 цагт Төрийн ордонд: ХНХЯ-наас "Хариуцлагатай бизнес ба тогтвортой хөгжил" сэдэвт жижиг, дунд бизнес эрхлэгчдийн уулзалт, хэлэлцүүлэг зохион байгуулна. Хэлэлцүүлэгт БЗД-ийн 800 орчим бизнес эрхлэгч оролцоно. Утас: 8805-8053.
- 09.00-11.00 цагт “Шангри-Ла” зочид буудалд ЗТХЯ-наас Дэлхийн банктай хамтран хэрэгжүүлэх авто замын төсөл хөтөлбөрүүдийн талаар танилцуулна. Утас: 8510-0098, 8805-7167.
- 09.00 цагт: “Блью Скай” зочид буудалд: “Тархины харвалт, зүрхний шигдээсний төрөлжсөн тусламж, үйлчилгээний 10 жил”-д зориулсан эрдэм шинжилгээний хуралтай.
- 09.30-15.30 цагт: Хавдар судлалын үндэсний төвд: "Хавдрын туяа эмчилгээний орчин үеийн технологи" олон улсын семинар болно. Утас: 9906-3902.
- 10.00 цагт: Цаг уур, орчны шинжилгээний газарт: БОАЖЯ-наас ээлжит хэвлэлийн бага хурал хийнэ. “Тэрбум мод” хөдөлгөөний үйл явц, “Монголд зочлох жил”-ийн хүрээнд өвлийн аялал жуулчлалыг хөгжүүлэх, Уур амьсгалын өөрчлөлтийн Суурь конвенцын талуудын ээлжит 28 дугаар бага хурал (COP 28)-ын талаар тус тус мэдээлж танилцуулна. Уас: 9404-4104.
- 10.30 цагт: НОБГ-ын хурлын танхимд: Хүний эрхийн талаарх “Эрхээ мэдье” тэмцээн эхэлнэ. Утас. 8822-5332.
- 11.00 цагт: Тусгаар тогтнолын ордонд: “Монголын Үнэн” сонины анхны дугаар хэвлэгдсэний 103 жилийн ойд зориулсан эмхэтгэлийн нээлт болно.
- “Зууны мэдээ” сонины мэдээллийн төвд:
- 11:30 цагт: “МОНГОЛ ДУГААР ЗУУН” яруу найргийн наадмын “Өргөмжлөл”-ийн хятад ханзны талаар наадмын ерөнхий шүүгч тайлбар мэдээлэл өгнө.
- 12.00 цагт: Байцаагч, прокурор эрх зүй зөрчиж, эрүүгийн хэрэгт ял өгч буй талаар хохирогчийн ээж мэдээлнэ.
- 13.00-18.00 цагт: “Аз Хур” номын төвд: Их, дээд сургуулийн сэтгэл судлалаар сурч байгаа оюутан, судлаачид “НОЙР БА СЭТГЭЦИЙН ЭРҮҮЛ МЭНД” сэдвээр хийсэн судалгааны ажлаа хэлэлцүүлнэ. Утас: 9909-8741, 8803-7533.
- 14.00 цагт: ГХЯ-нд “Монгол Улс дахь олон улсын судлалын өнөөгийн байдал, хөгжлийн хандлага” эрдэм шинжилгээний хурал болно. Энэхүү хурлыг ШУА-ийн Олон улс судлалын хүрээлэнгийн 55 жилийн ойд зориулан зохион байгуулж байна.
- 18.00 цагт: “Блью Мон” төвд: Монголын байгалийн гэрэл зурагчдийн бүтээлийн үзэсгэлэнг нээнэ.
Энэ өдөр дэлхийн түүхэнд:
- 1977 оны энэ өдөр Өмнө Солонгосын жүжигчин Вонь Бинь мэндэлжээ.
- 1982 оны энэ өдөр Орос-Украйны генерал, улс төрч, ЗХУ-ын агуу удирдагч, тэргүүн, Коммунист намын ерөнхий нарийн бичгийн дарга Леонид Брежнев таалал төгсчээ.
- 1989 оны энэ өдөр Герман Берлины ханыг нурааж эхэлжээ.
- 2009 оны энэ өдөр Хойд болон Өмнөд Солонгосын усан цэргүүд "Daecheong" арал дээр зэвсэгт мөргөлдөөн үүсгэжээ.
