Өнөөдөр гадаа -8 градусын хүйтэн байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
- Өнөөдөр бол жилийн 9 дахь өдөр бөгөөд он дуусахад 356 хоног үлдлээ.
- Цаг агаар өдөртөө -8 хэмийн хүйтэн бол шөнөдөө -23 градус хүйтэн байх нь ээ.
-
Билгийн тооллын XVII Жарны "Буян үйлдэгч" хэмээх Усан бар жилийн Өвлийн дунд хар хулгана сарын 18. Сумъяа гараг. Үнэг одтой, долоон улаан мэнгэтэй улаагчин туулай өдөр. Өдрийн наран 8 цаг 40 минутад мандан, 17 цаг 18 минутад жаргана. Тухайн өдөр хонь, гахай жилтнээ аливаа үйлийг хийхэд эерэг сайн. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, гарагийг тахих, мал аж ахуйн үйл, удирдлагын суудалд суух, хийморийн дарцаг хатгахад сайн. Газар хагалах, ус булгийн эх малтах, улаа гаргах, хиншүү хярвас гаргах, уул овоо тахихад муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод зүүн хойш мөрөө гаргавал зохистой. Үс шинээр үргээлгэх буюу засуулахад тохиромжгүй бөгөөд Эд малын гарлагатай хэмээжээ.
- Манай улсын голлох валют болох ам.долларын ханш авах нь 3465.00, зарах нь 3471.00 төгрөгтэй тэнцэж байгаа бол бусад валют болох рубль авах нь 46.70, зарах нь 47.70 юань 502.00, зарах нь 506.00, вон авах нь 2.76, зарах нь 2.80 байна.
Өнөөдөр болох онцлох үйл явдлууд:
- 11.00 цагт: Хавдрын Үндэсний зөвлөлөөс “Хавдартай тэмцэж буй дэлхийн чиг хандлага” сэдэвт уулзалт сургалтыг сэтгүүлчдэд зориулсан зохион байгуулж байна. Утас: 99106-580, 8802-3206.
- 11.30 цагт: “ЗМ” сонины “Үндэсний мэдээллийн төв”-д доктор Г.Төмөрхадуур их эрдэмтэн Л.Н.Гумилевын мэндэлсний 110 жилийн ойд зориулан гаргасан “Их эрдэмтэн Л.Гумилевын ярилцлага, нийтлэлүүд болон түүний тухай цомирлог” номын талаар мэдээлнэ.
- 12.00 цагт: АТГ-ын үүдэнд иргэдийн төлөөллөөс ХХААХҮ-ийн сайд Х.Болорчулуунтай холбоотой өргөдөл, баримтыг хэвлэлийнхэнд танилцуулж, АТГ-т шалгуулахаар өргөдөл өгнө.
Энэ өдөр дэлхийн түүхэнд:
- 2007 онд Apple компанийн гүйцэтгэх захирал Стив Жобс iPhone ухаалаг гар утсыг албан ёсоор танилцуулав.
- 2005 онд Өмнөд Суданы ардын чөлөөлөх арми, Өмнөд Суданы Засгийн газартай энхийн гэрээнд гарын үсэг зурснаар, Суданы хоёр дахь иргэний дайн өндөрлөжээ.
- 1992 онд Босни Герцеговин дахь Серб иргэдийн ассемблей Югославын холбооны улсад өөрийгөө зарласан Српскагийн бүгд найрамдах улсыг байгуулав.
- 1957 онд Египетийн Засгийн газартай Суэцийн сувгийн асуудлаас болж, дипломат харилцаагаа сэвтээхэд хүргэсэн Их Британийн ерөнхий сайд Сир Энтони Эден албан тушаалаа өөрийн хүсэлтээр өгөв.
- 1951 онд Нэгдсэн Үндэстний Байгууллагын төв байр АНУ-ын Нью-Йорк хотноо албан ёсоор нээгдэв.
- 1923 онд Хуан де ла Чьерва автожираар ниссэн анхны хүн болов.
- 1920 онд Улаан Арми Эрхүү хотыг чөлөөлжээ.
