“Оюуны наадам-2022” тэмцээн зохион байгуулахаар болсноо Монголын оюун ухааны академиас өчигдөр мэдээлэв. Тус тэмцээнийг энэ сарын 15-19-нд оюуны спортын таван төрлөөр (ой тогтоолт, түргэн бодолт, спорт өрөлт, рубикийн шоо, оюунтүлхүүр) зохион байгуулах юм. Тэмцээнд Улаанбаатар хот болон орон нутгийн 600 тамирчин өрсөлдөх аж. Тэр дундаа олон улсын түвшний, тив, дэлхийн аварга, цолтой тамирчид оролцох гэнэ. Тэмцээний нээлт энэ сарын 14-ний 15.00-17.00 цагт Үндэсний цэцэрлэгт хүрээлэнд болох нь. Ташрамд дурдахад Монголын оюун ухааны академи нь 2010 онд байгуулагдсан бөгөөд дэлхийд тэргүүлэх тамирчдыг бэлтгэсээр буй билээ. Тухайлбал, өнгөрсөн хугацаанд дотооддоо оюуны спортын 116 тэмцээн зохион байгуулжээ. Тэдгээрт 20 000 гаруй тамирчин хамруулан, АНУ, Британи, БНХАУ, БНСУ, БНЭУ зэрэг 20 гаруй оронд болсон 60 тэмцээнд тамирчдаа оролцуулсан байна. Манай улсын оюуны спортын тамирчид тив, дэлхийн аварга, оюуны олимп зэрэг томоохон тэмцээнд олон дээд амжилтыг эзэмшиж буй аж.
Бэлтгэсэн Г.Ариунзаяа
