Нутгийн баруун хагаст өчигдөр, төв хэсгээр өнөөдөр, төв болон говийн аймгуудын зүүн хэсгээр маргааш цас орж, зам, даваа гүвээнд халтиргаа гулгаа үүсэн, үзэгдэх орчин хязгаарлагдаж болзошгүйг цаг уурын байгууллагаас сэрэмжлүүллээ. Тодруулбал, өнөөдөр баруун аймгуудын зүүн хэсэг, төвийн аймгуудын ихэнх нутгаар цас орох нь. Маргаашаас эхлэн энэ сарын 25 хүртэл ихэнх нутгаар цас орж, хүйтний эрч чангарах юм байна. Салхи ихэнх хугацаанд секундэд 4-9, өчигдөр нутгийн баруун, өнөөдөр зүүн хагаст 13-15 метрт хүрч ширүүсэх гэнэ. Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө 37-42, өдөртөө 27-32 градус хүрч хүйтрэх аж. Улаанбаатар хот орчимд маргааш цас орох гэнэ. Харин энэ сарын 25-ныг хүртэлх хугацаанд нийслэлд цас орохгүйг цаг уурын байгууллагаас мэдээлэв. Яармаг, Сонгинын орчимд хамгийн хүйтэн буюу шөнөдөө 25-30 градус хүрэх нь.
Ч.Болор
