Өнөөдөр гадаа -5 градусын хүйтэн байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Гуравдугаар сарын 06-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 66 дахь өдөр бөгөөд он дуусахад 300 хоног үлдлээ.
- Цаг агаар өдөртөө -5 хэмийн хүйтэн бол шөнөдөө -23 градус хүйтэн байх нь ээ.
- Билгийн тооллын 24, Тугчин одтой, цагаагчин тахиа өдөр. Ангараг гараг. Өдрийн наран 7 цаг 38 минутад мандан, 18 цаг 32 минутад жаргана. Тухайн өдөр үхэр, могой жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номыг үйлийг эхлэх, дээдсээс халамж хүсэх, лам хувраг болох, багш шавьд барилдах, номын абшиг авах, шинэ гэр ба байр авахад сайн. Улаа гаргах, хиншүү хярвас гаргах, мод суулгах, нарийн зөвлөгөө хийх, байшингийн суурь тавих, угаал үйлдэхэд муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод баруун хойд зүгт мөрөө гаргавал зохистой. Үс шинээр үргээлгэх буюу засуулахад тохиромжгүй.
- Валют арилжааны төвд ам.долларын авах ханш 3385.00 төгрөг, зарах нь 3390.00 төгрөг байна. Харин рублийн авах ханш 35.60, зарах ханш 36.30, юанийн авах ханш 467.20, зарах ханш 471.70, вонийн авах ханш 2.55, зарах ханш 2.56 төгрөг байна.
Өнөөдөр болох онцлох үйл явдлууд:
- 11.00 цагаас Монгол Улсын Ерөнхийлөгч У.Хүрэлсүх Төрийн ордны Их танхимд “Төрийн цэргийн болон хууль сахиулах байгууллагын эмэгтэй ахлагч нарын анхдугаар чуулга уулзалт"-д оролцож үг хэлнэ.
- 11.30 цагт Соёлын яамны сайд Ч.Номингийн хууль бус үйлдлийн талаар, түүнд шаардлага хүргүүлэх болсон тухай Монголын Үндэсний музейн хамт олон мэдээлэл хийнэ.
- 12.00 цагт Монгол Улсын Ерөнхийлөгч У.Хүрэлсүх, Ерөнхий сайд Л.Оюун-Эрдэнэ, ЗГХЭГ-ын дарга Д.Амарбаясгалан, Хууль зүй, дотоод хэргийн сайд асан Х.Нямбаатар, Нийслэлийн Засаг дарга бөгөөд Улаанбаатар хотын захирагч асан Д. Сумъяабазар нарыг Олон улсын эрүүгийн шүүхэд өглөө. Тус шүүх нь Ганбаатар овогтой Ган-Очирын өргөдлийг хүлээн аваад хэрэг үүссэн талаарх бичгээ илгээжээ. Энэ талаар Францын иргэн Жан Люс Бертин, Монгол Улсын иргэн Г.Ган-Очир нар Монгол Ньюс хэвлэлийн хурлын танхимд мэдээлэл хийнэ.
Энэ өдөр дэлхийн түүхэнд:
- 1204 онд Английн Жон хааны удирдсан цэрэг Францын хаан II Филип Августусын армийг бут ниргэв. Ингэснээр Франц улс Норманди дахь хяналтаа алджээ.
- 1820 онд Миссури муж АНУ-ын Ерөнхийлөгч Жеймс Монротой харилцан ойлголцлын санамж бичиг зурснаар бүс нутгийнхаа хэмжээнд боолын худалдааг хориглосон байна.
- 1834 онд Канадын Торонто хотыг байгуулж эхэлжээ.
- 1869 онд Алдарт эрдэмтэн Дмитрий Менделеев Оросын химийн хүрээлэнд үелэх системээ анх удаа танилцуулжээ.
- 1882 онд Сербийн хаант улс дахин байгуулагджээ.
- 1899 онд Баейр эмийн үйлдвэр "Аспирин" эмийг худалдаалах эрхийг авав.
- 1902 онд Испанийн эзэн хааны "Реал Мадрид" хөлбөмбөгийн клуб байгуулагджээ.
- 1913 онд Монгол Улсад “Шинэ толь хэмээх бичиг” сонин анх удаа хэвлэгдэв. Үүнээс Монголын орчин цагийн сэтгүүл зүй үүсч хөгжсөн гэж үздэг.
- 1967 онд ЗХУ-ын удирдагч агсан Й.Сталиний охин Светлана Алилуева АНУ руу дүрвэжээ.
- 1988 онд Их Британийн тусгай хүчний зохион байгуулсан "Флавиус" ажиллагааны үеэр Ирландын бүгд найрамдах армийн гурван цэргийг буудан хороожээ.
