Дональд Жон Трамп 1946 онд Нью-Йорк хотноо төржээ. Удам судрыг нь хөөвөл эмээ, өвөө хоёр нь бүр 1885 онд Германаас ирсэн цагаачид аж. Дональд Трамп эхээс тавуул юм. Тэрбээр Нью-Йоркийн цэргийн академид сурч байхдаа 1962, 1963 онд хөлбөмбөг, бейсболын багт нь тоглож байжээ. Өөрийнх нь бичсэнээр бол академиа төгсөөд кино урлагийн сургуульд орох бодолтой байсан ч үл хөдлөх хөрөнгө ашиг ихтэй бизнес болохыг ойлгосон байна. Тэгээд Фордэмийн их сургуульд сурч эхэлсэн ч хоёр жил болоод Пенсильванийн их сургуулийн бизнесийн сургуульд оржээ. Энэ сургуулиа төгсөөд шууд гэртээ очиж, эцгийнхээ дэргэд ажиллаж, эхлээд дундаж амьдралтай хүмүүст байр түрээслэх бизнес эрхлэв.
1989 он болоход Трамп санхүүгийн хямралаас болж зээлээ төлж чадаагүй л байлаа. Харин 1994 он гэхэд өөрийн хувийн зээл 900 сая ам.долларынхоо ихэнхийг даржээ. 1989 онд худалдаж авсан “Trump shuttle” компаниасаа татгалзахаас аргагүй болсон ч Нью-Йорк дахь “Трамп тауэр”-ээ авч үлдэж, Атлантик ситид байдаг гурван казиногийнхоо ажлыг удирдах эрхээ бас хадгалж хоцорч чаджээ.
Трампын тангараг өргөх ёслолд бэлтгэх ажил үндсэндээ дуусаж байна. Бэлтгэл
ажлын үеэр Трампын дүрд хуурай замын цэргийн хөгжмийн ангийн алба хаагч Грег Лоуэри, гэргий Меланьяг нь Сара Керри орлон тоглож байна
Дональд Трамп үл хөдлөх хөрөнгийн бизнес эрхэлж, тэрбумтан болсныг нь бид мэднэ. Барилгын салбарынхан түүнийг үл хөдлөх хөрөнгийг нь борлуулж өгсний төлөө мөнгө төлдөг аж. Тийм ч учраас “Трампын” гэж нэрлэгддэг олон байшин байвч тэр бүр түүний хөрөнгө байдаггүй юм. “Форбес” сэтгүүлд бичсэнээс үзвэл одоогийн байдлаар Нью-Йоркийн Манхэттэн дүүрэг, Флорида муж улс болон АНУ-ын бусад нутаг дэвсгэр дээр баригдаж буй Трампын нэртэй, лицензтэй объект 33 байдаг гэнэ.
Трампын хувийн хөрөнгийг “Форбес” сэтгүүл 2016 онд 3.7 тэрбум доллароор үнэлсэн байдаг. Үүгээрээ тэрбээр Америктаа 113 дугаарт жагсаж буй юм. Түүний хувийн хөрөнгөд тооцогддог “Трамп тауэр” нь 288 сая ам.долларын өртөгтэй, энд байх түүний хувийн өргөө нь 50 саяас багагүй ам.долларын үнэтэй бөгөөд Нью-Йоркийн хамгийн өндөр үнэтэй байруудын нэг гэж үздэг. Сан-Францискод байх “Калифорни стриит, 555” гэдэг барилгын 30 хувь нь Трампынх аж. Энэ хувийн үнэлгээ 540 сая ам.доллар. Уоллстриит 40-д байх “Трамп билдинг”-ийг “Форбес” 260 сая ам.доллароор үнэлсэн байдаг. Энэ мэтээр Трампын хөрөнгийг тоочвол их тоо гарна. Түүнд “Трамп Таж Махал”, “Трамп плаза, Атлантик сити”, “Трамп Марина” гэсэн гурван казино, гольфын зургаан талбай бий.
Трамп анх 2000 оны Ерөнхийлөгчийн сонгуулийн урьдчилсан санал хураалтад оролцож, Мичиган, Калифорни муж улсад ялалт байгуулж байжээ. Тэр үедээ Дэд Ерөнхийлөгчид телевизийн нэрд гарсан хөтлөгч, хатагтай Опра Уинфрийн нэрийг дэвшүүлж байсан аж. Танхимынхаа бүрэлдэхүүнд Колин Пауэлл, Жон Маккейн нарыг оруулахаар төлөвлөж байжээ. Колин Пауэлл нь сүүлд Батлан хамгаалахын сайдаар ажиллаж байсан бол Жон Маккейн нь Вьетнамын дайнд оролцож байсан, Сенатын гишүүн юм.
Тэгвэл 2016 оны Ерөнхийлөгчийн сонгуульд нэрээ дэвшүүлэх боломжийг эргэцүүлж байгаагаа 2015 оны нэгдүгээр сарын 25-нд Айова муж улсад болсон БНН-ын гишүүдийн хурал дээр мэдэгдсэн байна. Тэгээд нэрээ дэвшүүлэхээр шийдсэнээ зургадугаар сарын 16-нд Манхэттэнд байдаг “Трамп тауэр” гэдэг тэнгэр баганадсан байшинд байрладаг өргөөндөө албан ёсоор зарлажээ.
Түүний сонгуулийн кампанит ажил “Америкийг дахин агуу болгоно” гэсэн уриатай байв. Энэ үедээ тэрбээр лалын шашинтнуудын эсрэг хэдэн ширүүхэн мэдэгдэл хийсэн, тэднийг Америк руу огт нэвтрүүлэхгүй байхыг уриалсан. Түүний зарим үг ардчиллын үнэт зүйлд нийцэхгүй гэж үзээд Их Британийн Роберт Гордоны их сургууль 2010 онд түүнд олгосон хүндэт докторын хэргэмээ 2015 оны эцсээр буцаан авч ч байлаа. Хатуухан мэдэгдлүүд нь Трампын чансааг огцом унагаж байсан тохиолдол ч бий.
Трамп 1977 онд 28 настай Ивана Зельничковатай гэрлэж гурван хүүхэдтэй болсон байна. Тэд 1992 онд салжээ. Трамп 1993 онд 29 настай Марла Меиплзтэй сууж нэг охинтой болоод 1999 онд хоёр тийш болов. 2005 онд словени гаралтай Меланья Кнавстай суухад тэрбээр 35 настай, Трампаас 25 дүү байв. Меланья 2006 онд хүү төрүүлэв. Трамп одоо найман ач, зээтэй. Трамп гольф тоглох дуртай. Тэрбээр 20-иод ном бичжээ.
