Энэтхэгийн Мумбай хотноо өнгөрсөн сарын сүүлчээр “Counter strike 2”-ын цомын төлөөх тэмцээн болж өндөрлөлөө. И-спортын олон төрлийн тоглоомын томоохон тэмцээнүүдийг зохион байгуулдгаараа алдартай “Skyesports”-ын ээлжит нэгэн тэмцээн нь энэ байв. “Skyesports”-ын тэмцээнүүдэд тогтвортой оролцож буй багууд үүнд өрсөлддөг аж.
Эл тэмцээнд “MongolZ”-ийнхэн Оросын “Am¬kal”, Туркийн “Eternal fire” багийг ялж, цомын төлөө тоглох эрхээ авсан. 300 мянган ам.долларын шагналын сантай цомын төлөөх тэмцээнд тэд Францын “3DMAX” багтай тоглож ялагдал хүлээсэн юм. Ингэснээр “MongolZ” баг хоёрдугаар байр эзэлжээ. Түрүүлсэн баг 120 мянган ам.долларын эзэн болсон. Тэгвэл манай тамирчид 70 мянган ам.доллароор шагнуулав.
Үүний дараа “MongolZ” баг энэ сарын 7-18-нд Германд болох нэг сая ам.долларын шагналын сантай “IEM Cologne-2024” тэмцээнд оролцохоо мэдэгдээд байна.
Ташрамд дурдахад, “MongolZ” багийг анх 2014 онд “Dota 2” тоглоомын төрөлд өрсөлдүүлэхээр байгуулж байжээ. Тухайн үед тэд “Dota 2”-ын дотоодын хамгийн шилдэг багуудын нэг болсон юм. Удалгүй 2015 онд “Counter strike”-аар өрсөлдөх бүрэлдэхүүнийг байгуулсан. Тэдний томоохон амжилт нь 2016 оны “IEM Taipei-2016” тэмцээний аварга болж, Азидаа нэгт жагссан нь юм.
“MongolZ”-ийс энэ онд гаргасан амжилтыг дурдвал, “Copenhagen-2024” тэмцээнд ялалт байгуулж, дэлхийн шилдэг 16 багийн нэг болсон билээ. Энэ үйл явдал нь Монголын багийн түүхэн амжилтуудын нэг.
Бэлтгэсэн Ц.Ану
