Арабын Нэгдсэн Эмират Улсын Абу-Даби хотноо зохион байгуулсан, цахим спортын чансаагаар хамгийн өндөр тэмцээнүүдийн нэг болох “YaLLa сompass 2024”-т “MongolZ” багийнхан аваргаар тодров. Цахим спортын нэгдүгээр түвшний тэмцээнд 14 жилийн дараа Азийн баг шилдгээр тодорсон тохиолдол нь энэ болж, шинэ түүхэн амжилт гаргалаа. Аваргаар тодорсноор “MongolZ” багийнхан 200 000 ам.долларын эзэн болов. Мөн тус багийн тамирчин Б.Өсөхбаяр буюу “910” Азиас анх удаа HLTV сайтын MVP буюу шилдэг тоглогчоор шалгарлаа. Энэхүү сайт нь цахим спортын тоглогчдын чансааг тодорхойлдог юм байна. Дээрх тэмцээний аваргыг энэ сарын 9-10-нд шилжих шөнө шалгаруулсан. “MongolZ”-ийнхэн үүний дараа Швед улсад энэ сарын 14-16-нд зохион байгуулах “ESL сhallenger jonkoping-2024” тэмцээнд оролцох нь. Тэд үүнээс өмнө “MESA nomadic masters-2024” тэмцээний аварга болсон билээ.
Бэлтгэсэн: А.Үүлэн
