Аравдугаар сарын 9-ний өдөр
Өнөөдөр гадаа 14 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Өглөөд заавал мэдэж байх ёстой зүйлүүд:
- Өнөөдөр бол жилийн 282 дахь өдөр бөгөөд он дуусахад 83 хоног үлдлээ.
- Цаг агаар өдөртөө 14 хэмийн дулаан бол шөнөдөө 1 хэм хүйтэн байх нь ээ.
- Аргын тооллын 10 сарын 9, Сумьяа гараг. Билгийн тооллын 25, Үнэг одтой, цагаан хулгана өдөр. Өдрийн наран 7 цаг 2 минутад мандан, 18 цаг 17 минутад жаргана. Тухайн өдөр луу, бич жилтнээ аливаа үйлийг хийхэд эерэг сайн. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, лусыг тахих, хүүхэд үрчлэн авах, хур оруулах, дархны үйлд сайн. Улааны үйл, төлгө тавих, морь уралдах, сэтгэлд сэвтэй газар очиход муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар зүүн зүгт одогсод мөрөө гаргавал зохистой. Үс шинээр үргээлгэх буюу засуулахад тохиромжгүй.
- Валют арилжааны төвд ам.долларын авах ханш 3456.00 төгрөг, зарах нь 3460.00 төгрөг байна. Харин рублийн авах ханш 34.60, зарах ханш 35.40, юанийн авах ханш 476.50, зарах ханш 478.00, вонийн авах ханш 2.60, зарах ханш 2.62 төгрөг байна.
Өнөөдөр болох онцлох үйл явдлууд:
- 09.00 цагт: УИХ дахь намуудын бүлэг хуралдана. Байнгын хороодын хуралдаан болно.
- 09.00-17.30 цагт: ХААИС-д: “Хот суурин газрын ландшафтын архитектур-2023-Хотын байгальд түшиглэсэн шийдэл” олон улсын хурал болно. “Байгальд түшиглэсэн ландшафтын архитектур төлөвлөлтийн орон зайн шийдэл” үзэсгэлэн “Хатан Туул” театрт 9-10-нд нээгдэж байна.
- 09.30-12.30 цагт Төрийн ордны "Чингис хаан" танхимд "Архи, согтууруулах ундааны зохисгүй хэрэглээг бууруулах нь" сэдэвт салбар хоорондын хэлэлцүүлэг болно. Хэлэлцүүлгээр Ерөнхийлөгчийн гаргасан 43 дугаар зарлигийн хэрэгжилт, "Архидан согтуурахтай тэмцэх, урьдчилан сэргийлэх үйл ажиллагааг дэмжих сан", ногдуулж байгаа албан татвар, гэмт хэрэг, зөрчил, зохисгүй хэрэглээ, донтох үеийн тусламж үйлчилгээ, импорт, экспорт зэргийн талаар ярилцана. Зохион байгуулагч ЕТГ, ХЗДХЯ, ЭМЯ, ДЭМБ-ын Суурин төлөөлөгчийн газар, СЭМҮТ.
- 10.00 цагт: “Шангри-Ла” зочид буудалд. "Mining week-2023" эхэлнэ.
- 11.00 цагт: Төрийн ордонд: ХҮН намын дэргэдэх Бодлого, судалгааны хүрээлэнгийн судлаачид болон эдийн засагчид ирэх оны Төсөв, мөнгөний бодлогын талаар мэдээлэл хийнэ.
- 11.00 цагт: Засгийн газрын ордны баруун хаалганд: Эцэг эхчүүдийн төлөөллүүд "Хүүхдийн эсрэг үйлдсэн гэмт хэрэг"-т ялын бодлогыг чангатгах хууль яаралтай батлах талаа УИХ, Засгийн газарт шаардлага хүргүүлнэ.
- 11.30 цагт: “ЗМ” сонины мэдээллийн төвд: Хүн амины хэргийг мөрдөж байсан байцаагч 50 сая төгрөгийн хахууль авсан нь илэрсэн ч торгуулиад өнгөрсөн. “Барс” зах дээр хүүгийнх нь аминд хүрсэн хэрэг илрэхгүй 5 жил болж байгаа талаар хохирогчийн ээж, өмгөөлөгч нар мэдээлэл хийнэ.
- УИХ-ын Ес зүйн хороо, МУИС хамтран "Нийгмийн ёс зүйн асуудал" хэлэлцүүлэг зохион байгуулна.
- “Зайсан Хилл” цогцолборт "Дэлхийн сансрын 7 хоног” үргэлжилнэ.
Энэ өдөр дэлхийн түүхэнд:
- 1941 оны аравдугаар сарын 9-ний энэ өдөр АНУ-ын Ерөнхийлөгч Франклин Рузвельт “Манхэттений төсөл” буюу дэлхийн хамгийн анхны атомын зэвсэг хийх хөтөлбөрийг баталжээ. Франклин Рузвельт эрдэмтэн Ванневар Бушт уг даалгаврыг өгсөн бөгөөд 1942 оны нэгдүгээр сард албан ёсоор зөвшөөрсөн байдаг.
- 1990 оны аравдугаар сарын 9-ний энэ өдөр Иракийн Ерөнхийлөгч, дарангуйлагч Саддам Хуссейн шинэ төрлийн хүчирхэг пуужинтай болсноо зарлаж, Израиль, АНУ-ын цэргүүдийг бут цохих чадвартай хэмээн сүрдүүлж байжээ.
- 2006 оны аравдугаар сарын 9-ний энэ өдөр Хойд Солонгос анхны цөмийн зэвсгийн туршилтаа хийжээ. БНАСАУ-ын анхны цөмийн зэвсгийн туршилтын дэлбэрэлтийн хүч нэг килотонноос бага байсан ч, дэлбэрэлтээс нь цацраг идэвхт гаралт илэрсэн байдаг.
- 1960 оны аравдугаар сарын 9-ний энэ өдөр “The Beatles” хамтлагийн гоцлол дуучин Жон Леннон мэндэлжээ. “The Beatles” хамтлагийн талаар мэдэхгүй хүн цөөн. Тэднийг XX зууны шилдэг дуу гэгддэг “Yesterday” дууг дуулснаар нь сонсогчид нэн түрүүнд санан дурсдаг биз ээ. Тэрээр 1960 оны эл өдөр Их Британийн Ливерпүүл хотод төрсөн.
- 1962 - Оонокүни Ясүши сүмогийн 62 дахь ёкозүна мэндэлжээ.
