Аравдугаар сарын 4-ны өдөр
Өнөөдөр гадаа 13 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Өглөөд заавал мэдэж байх ёстой зүйлүүд:
- Өнөөдөр бол жилийн 277 дахь өдөр бөгөөд он дуусахад 88 хоног үлдлээ.
- Цаг агаар өдөртөө 13 хэмийн дулаан бол шөнөдөө 3 хэм хүйтэн байх нь ээ.
- Билгийн тооллын 20, одтой, хонь өдөр. Өдрийн наран 6 цаг 55 минутад мандан, 18 цаг 27 минутад жаргана. Тухайн өдөр гахай, туулай жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эе, эвээ ололцох, хамтын хөдөлмөр эхлэх, гэрээ хэлцэл байгуулах, найр хурим хийх, бэр гуйх, инж өгөх, авах, үнэт эрдэнийн зүйл авах, хишиг даллага дуудуулах, насан бүтээл хийлгэх, мал худалдан авах, мал түгээх, сахил санваар авах, хануур, төөнүүр хийлгэх, хийморийн дарцаг хатгахад сайн. Эрдэнийг гадагш өгөх, уул овоо тахихад муу. Өдрийн сайн цаг нь бар, туулай, могой, бич, нохой, гахай болой. Хол газар яваар одогсод урагш мөрөө гаргавал зохистой. Үс шинээр үргээлгэх буюу засуулахад тохиромжгүй
- Валют арилжааны төвд ам.долларын авах ханш 3455.00 төгрөг, зарах нь 3460.00 төгрөг байна. Харин рублийн авах ханш 35.60, зарах ханш 36.00, юанийн авах ханш 474.00, зарах ханш 415.50, вонийн авах ханш 2.58, зарах ханш 2.60 төгрөг байна.
Өнөөдөр болох онцлох үйл явдлууд:
- 08.30 цагт: “Холидэй Инн” зочид буудалд: “Инженерийн шийдэл-хөгжлийн тулгуур” зөвлөгөөнийг “Тавантолгой түлш” ХХК-иас дунд хугацааны төлөвлөгөө боловсруулах ажлын хүрээнд инженер, техникийн ажилтнуудын дунд зохион байгуулна.
- 14.00 цагт: “Пума империал” зочид буудалд: “Хулгайгүй эрх тэгш нүүрс тээвэр” зөвлөлдөх уулзалт, нээлттэй хэлэлцүүлэг болно.
- Засгийн газрын ээлжит хуралдаан болно.
- Бүх нийтээр мод тарих Үндэсний өдөр эхэлнэ. Монгол Улсын Ерөнхийлөгчийн зарлигаар үндэсний мод тарих өдрийг жил бүр зохион байгуулж байна. Энэ намрын бүх нийтээр мод тарих үндэсний өдрийг 10 дугаар сарын 4-16-нд зохион байгуулна.
- “Нийгмийн үзүүлэлтийн түүвэр судалгаа”-ны мэдээлэл цуглуулах үйл ажиллагаа орон даяар эхэлнэ. Судалгааг ҮСХ НҮБ-ын Хүүхдийн болон Хүн амын сантай хамтран 3 дахь удаа зохион байгуулж байна.
Энэ өдөр дэлхийн түүхэнд:
- Дэлхийн амьтдын өдөр (World Animal Day) буюу Амьтны эрхийг хамгаалах олон улсын өдрийг жил бүрийн энэ өдөр тэмдэглэдэг.
- Дэлхийн сансрын долоо хоногийг (World Space Week) аравдугаар сарын 4-10 хооронд тэмдэглэж байхаар НҮБ-ын Ерөнхий ассамблей 1999 оны арванхоёрдугаар сарын 6-ны 54/68 тоот тогтоолоор тогтжээ. Сансрын шинжлэх ухаан, техникийн хүний амьдралд оруулж байгаа хувь нэмрийг сурталчлан тэмдэглэх зорилготой баяр юм.
- 435 жилийн өмнө буюу 1582 оны аравдугаар сарын 4-нд Ромын хамба XIII Григорийн зарлигаар хамбын нэрээр нэрлэгдсэн хуанлид орсон үйл явдал хийгджээ. Григорианы буюу өнөө цагийн хуанли нь Юлий Цезарийн шинэчлэлийн дагуу манай эриний өмнөх 46 оноос эхлүүлэн манай эрин хүртэл мөрдөгдсөн юлианы хуанлигаас эхлэлтэй.
- АНУ-ын 19 дэх Ерөнхийлөгч Ратерфорд Берчард Хейс Ратерфорд (Резерфорд) Берчард Хейс 1822 оны аравдугаар сарын 4-нд төржээ.
- 60 жилийн өмнө дэлхийн анхны хиймэл дагуулыг тойрог замд гаргажээ. Сансрын анхны хүний гараар бүтээгдсэн хиймэл дагуулыг Р-7 пуужин зөөгчөөр хожим Байконур нэртэй олсон Батлан хамгаалах яамны туршилтын талбайгаас Зөвлөлт хөөргөсөн юм.
