Наймдугаар сарын нэгдүгээр арав хоногт Хөвсгөлийн уулсаас эхтэй Дэлгэрмөрөн, Эг, Бэлтэс, Бүгсий, Шишхэд зэрэг голуудын усны түвшин хугацааны эхээр 5-15 см буурсан явцтай байсан ба арав хоногийн дундаж түвшин олон жилийн дундаж болон өмнөх оны мөн үеийнхээс 5-45 см бага харин Үүр голын хувьд олон жилийн дунджаас 230 см ахиу устай байсан байна.
Хангай нурууны араас усжих Идэр, Хануй, Чулуут, Хойттамир, Урдтамир зэрэг голуудын усны түвшин өнгөрсөн 10 хоногийн эхээр 5-80 см нэмэгдсэн хэдий ч аажмаар буурсан ба арав хоногийн дундаж утгаараа 2023 оны мөн үеийнхээс 5-40 см ахиу түвшинд байна.
Хэнтий нурууны баруун хажуугаас эхтэй Хараа, Ерөө, Туул, Тэрэлж, Сөгнөгөр зэрэг голуудын усны түвшин энэ сарын эхээр 5-70 см нэмэгдэж Хараа голын адгаар, Туул гол Улаанбаатар, Алтанбулаг орчимд үерийн түвшинг 5-75 см, Туул гол Лүн сум орчимд үерийн аюултай түвшинг 50-90 см даван үерлэсээр байна. Эдгээр голуудын арав хоногийн дундаж түвшинг өнгөрсөн оны мөн үеийнхтэй харьцуулбал 10-55 см бага харин Туул голын дунд болон адгаар усны түвшин олон жилийн дундаж болон өмнөх оны мөн үеэс 45-140 см ахиу байна.
Орхон, Сэлэнгийн нийт уртын дагууд энэ сарын 1-5-ны өдрүүдэд усны түвшин 5-70 см нэмэгдэж аажмаар буурсан ба Орхон гол Орхон сум орчмоор үерийн түвшинг 5-70 см даван үерлэсэн. Орхон голын нийт уртын дагууд, Сэлэнгэ мөрний дунд хэсгээр арав хоногийн дундаж түвшин өмнөх оны мөн үе болон олон жилийн дунджаас 10-80 см ахиу байна
Номхон далайн ай савын гол, мөрөн
Хэнтий нурууны ар, зүүн хажуугаас усжих Хурх, Барх, Эг голуудын усны түвшин энэ сарын 1-2-нд 5-85 см нэмэгдсэн ч аажмаар буурсан хэдий ч дээрх голууд тухайлбал Хэрлэн голын адгаар, Эг, Халх голын эхээр үерийн түвшинг 10-70 см, Барх, Хурх, Онон, Улз, Хэрлэн голын дунд хэсгээр үерийн аюултай түвшинг 5-200 см даван хүчтэй үерлэсэн. Хэнтий нурууны зүүн хажуугийн дээрх голуудын арав хоногийн дундаж түвшинг олон жилийн дундаж болон 2023 оны мөн үеийнхтэй харьцуулбал 25-260 см ахиу байна.
Төв Азийн гадагш урсацгүй ай сав
Алтай нуруунаас эхтэй Ховд, Буянт, Согоог, Сагсай, Турган, Харбут, Булган, Бодонч, Төгрөг, Чигэртэй, Үенч, Дундцэнхэр, Чонохарайх, Долооннуур зэрэг голуудын усны түвшин өмнөх арав хоногийн турш аажим буурсан байдалтай байсан ба арав хоногийн дундаж түвшин олон жилийн дунджаас 5-75 см бага өнгөрсөн жилийн мөн үеийнхээс 5-55 см ахиу байна. Харин Ховд, Буянт гол хугацааны эхээр үерийн түвшинг давсан байдалтай арав хоногийн дундаж утгаараа олон жилийн дунджаас 30-45 см орчим их түвшинд байв.
Хангай нурууны өврийн Чигэстэй, Богд, Буянт, Хүнгүй, Хожуул, Завхан, Зүйл, Шарга, Түй, Заг, Байдраг, Шаргалжуут, Цагаантуруут, Онги, Таац, Зэгстэй зэрэг голуудын усны түвшин өмнөх арав хоногт харьцангуй хоногийн түвшний өөрчлөлт багатай байсан ба арав хоногийн дундаж түвшин нь олон жилий дунджаас 10-90 түвшинд байсан байна.
Увс нуурын савын Чигж, Баруунтуруун, Тэс, Түргэн, Хариг, Хангилцаг, Хархираа, Намир зэрэг голуудын усны түвшин өнгөрсөн хугацаанд харьцангуй өөрчлөлт багатай байлаа. Чигж, Баруунтуруун, Тэс зэрэг голуудын арав хоногийн дундаж түвшин олон жилийн дундаж болон өмнөх оны мөн үеийнхээс 5-60 см бага байна.
Наймдугаар сарын нэгдүгээр арав хоногийн эхээр нутгийн төв болон зүүн хэсгээр үргэлжлэн орсон усархаг борооны улмаас Хэнтий нуруунаас эхтэй голуудын усны түвшин богино хугацаанд огцом нэмэгдэж, үерийн болон аюул түвшинг даван хүчтэй үерлэсэн ба Хэрлэн голын эх болон Онон голын адгаар ойрын үед тохиож байгаагүй томоохон хэмжээний үер өнгөрсөн элбэг устай арав хоног тохиосон байна.
УЦУОСМХ-ийн Гадаргын усны судалгааны хэлтэс
