Өнөөдөр гадаа 9 хэм дулаан байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй
Аравдугаар сарын 25-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 296 дахь өдөр бөгөөд он дуусахад 67 хоног үлдлээ.
- Цаг агаар өдөртөө 9 хэмийн дулаан бол шөнөдөө 4 хэм хүйтэн байх нь ээ.
- Билгийн тооллын 11, Шувуун хошуут одтой, улаан луу өдөр. Өдрийн наран 7 цаг 25 минутад мандан, 17 цаг 47 минутад жаргана. Тухайн өдөр хулгана, бич жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр элдэв үйлд хянуур хандах хэрэгтэй ба ан, гөрөө хийх, мал, адгуус муулах, угаал үйлдэх, бороо хур оруулах, зэтгэрийг номхотгох, хөгжмийн зэмсэг урлах, дархны үйлд сайн. Гүүр тавих, газар шороо ухахад муу. Өдрийн сайн цаг нь бар, луу, могой, бич, тахиа, гахай болой. Хол газар яваар одогсод зүүн зүгт мөрөө гаргавал зохистой. Үс шинээр үргээлгэх буюу засуулбал эрхтэн хурц болно.
- Манай улсын голлох валют болох ам.долларын авах ханш 3452.00 төгрөг, зарах нь 3458.00 төгрөг байна. Харин рублийн авах ханш 35.50, зарах ханш 36.00, юанийн авах ханш 473.50, зарах ханш 474.50, вонийн авах ханш 2.59, зарах ханш 2.61 төгрөг байна.
Өнөөдөр болох онцлох үйл явдлууд:
- 10.00 цагт: “Далай таур”-т: “Шинэ Хар Хорум хот”-ын бүтээн байгуулалтын Үндэсний хороо хуралдана. Утас: 9507-1740.
- 11.00 цагт: АТГ-ын "Олон нийтийн төвд: Сүүлийн үеийн мөрдөн шалгах ажлын үр дүнгийн талаар мэдээлнэ. Хэвлэлийн бага хуралд АТГ-ын Мөрдөн шалгах хэлтсийн албаны дарга нар оролцоно. Утас: 9168-9111.
- 11.00 цагт: “Галерей Улаанбаатар” төвд: СЕО клубээс НӨАТ-ын буцаан олголтыг нэмэгдүүлэх, татварын бааз суурийг өргөтгөх боломж, далд эдийн засгийг бууруулах талын судалгааны үр дүн танилцуулна.
- 11:30 “Зууны мэдээ” сонины “Үндэсний мэдээллийн төв”-д цагаас “Баянд бөхөлзөж, Ядууст данхалздаг монголын төрд кетчуп цацах л болно” сэдвээр Иргэн Мишиг мэдээлэл хийнэ.
Энэ өдөр дэлхийн түүхэнд:
- 1990 оны аравдугаар сарын 25-ны өдрийн Казах ССР-ын бие даасан байдлын тухай тунхаглалд Казахстаны дотоод бодлогыг Зөвлөлтийн удирдлагаас бие даан явуулах тухай заасан байлаа. Казахстаны тусгаар тогтнолыг 1991 оны арванхоёрдугаар сарын 16-нд зарлажээ. Тэр өдөр хамгийн түрүүнд гадаад орнуудаас Турк Казахстаны тусгаар тогтнолыг хүлээн зөвшөөрч байлаа.
- 1922 оны энэ өдөр Япончууд ба цагаан гвардийнхан Владивостокийг орхин гарснаас хоёр цагийн дараа цэрэг хотод орж ирснээр Зөвлөлт Оросын иргэний дайн дуусжээ.
- Тайвань улсыг 1971 оны энэ өдөр НҮБ-ын гишүүнээс хассан байна. Түүний байрыг БНХАУ-д шилжүүлсэн ба тэр цагаас хойш Хятадыг НҮБ-д Бээжингийн Засгийн газар л төлөөлөх болсон юм.
