“Бизнес эрхлэгчдийг залхаан цээрлүүлдэг шаардлагагүй бичиг баримт, шат дамжлагыг цөөлөх хэрэгтэй”

МҮХАҮТ, Улаанбаатар хотын худал­даа­ны танхим, “Монголын эдийн засгийн форум” НҮТББ, Монголын хүнсчдийн холбоо тэргүүтэй байгууллагын болон биз­нес эрхлэгчдийн төлөөлөл хамтран биз­несийн орчны асуудлаар өчигдөр хэв­лэлийн хурал хийлээ. Монголд бизнес эрхлэхийн тулд хуулиасаа давсан олон зөвшөөрөл авч, шаардлагагүй бичиг ба­римтууд бүрдүүлж, цаг хугацаа үрсэн шат дамжлагуудыг давдаг тогтолцоо үйл­чилж бай­гааг тэд дурдлаа.
МҮХАҮТ-ын ерөнхийлөгч Л.Төр-Од “Хам­тарсан Засгийн газраас хэрэгжүүлж буй бизнест ээлтэй хөтөлбөрүүдийг дэм­­жиж байгаа. Цар тахлын дараах саад тот­горыг арилгах зорилготой гэж ойл­годог. Юуны түрүүнд татварын орч­ныг цог­цоор нь шинэчлэх хэрэгтэй. Жи­жиг, дунд үйлдвэрлэл болон өрхийн биз­нес эрхлэгчдийг татвараас чөлөөлж, хөл дээр нь босгох шаардлагатай. Ажилчид болон албан байгууллагууд аль аль нь 25 хувийн шимтгэл төлдөг байдлыг халах цаг нь болсон. Төрөөс олгодог тусгай зөв­шөөр­лийн тоо багассан мэт боловч үүнийг авахад шаарддаг баримт бичиг тойм­гүй олон байна. Мөн олон арван шат дамжлага давдаг, удаан хугацаагаар хүлээл­гэдэг байдал нь ч өөрчлөгдөөгүй” гэсэн юм. 
Бизнес эрхлэхэд төрөөс авах ёстой бичиг баримтад 331 төрлийн гэрээ, 264 бүртгэл, 232 дүгнэлт, 161 тодорхойлолт, 30 батламж, есөн сертификат, дөрвөн ли­­­ценз багтаж буй гэнэ. Эдгээрийг наа­на­­даж 50 хүртэлх хувиар бууруулах шаард­­­лагатай гэж бизнес эрхлэгчид үзэж байна. Зөвшөөрлийн тухай хууль­тай зөр­чилдсөн дүрэм, журам, ач хол­бог­­дол­гүй баримт бичгийг хүчингүй бол­гох, шат дамжлагыг нь багасгах, тусгай зөвшөөрлийн хүсэлтийг хуульд заа­сан хугацаанд шуурхай шийдвэрлэдэг болох шаардлагыг холбогдох байгуул­лагын­ханд та­вилаа. Түүнчлэн бизнес эрх­лэгчдийг Зөв­шөөрлийн тухай болон татварын холбогдолтой гол хуу­лиудын шинэчлэлд онцгой анхаарч, байр сууриа цаг алдалгүй илэрхийлэн, санал са­наа­чилга гаргахыг дээрх бай­гуул­лагын төлөөл­лүүд уриалав.

Н.Ган