“Монгол Улсыг хөгжүүлэх арга хэмжээнд 2021-2024 онд 21.7 их наяд төгрөг зарцуулсан ч эерэг өөрчлөлт гарсангүй” 

Төрийн аудитын байгууллагаас “Монгол Ул­сыг 2021-2025 онд хөгжүүлэх таван жилийн үнд­­сэн чиглэлийн хэрэгжилт”-д хийсэн гүй­цэт­­гэлийн аудитын тайланг УИХ-ын Төрийн бай­гуу­лалт, Эдийн засгийн байнгын хорооны хам­тар­сан хуралдаанд танилцуулав. Таван жилийн үндсэн чиглэлийг есөн бодлого, зо­рилгын хү­­рээнд 47 зорилт, 243 арга хэмжээтэй хэ­­рэг­­жүү­лэхээр баталжээ. Мөн хөрөнгө оруу­лал­тын хөтөлбөрт тусгагдсан нийт 150 төсөл, арга хэмжээний, ТЭЗҮ зураг төсөл боловсруулах шаардлагатай 98, санхүүжилтийн эх үүсвэрийг шийд­вэрлэх шаардлагатай 88 төсөл, арга хэм­жээний жагсаалтыг тус тус баталсан байна. Гэвч хэрэг­жүүлэхээр тусгасан 243 арга хэмжээнээс 108 нь шалгуур үзүүлэлт, суурь болон хүрэх түв­шингүй байгаа нь хуулийн шаардлагыг бүрэн хан­гаагүй гэж аудитын дүгнэлтэд дурджээ. Тод­руулбал, аудитын явцад цуглуулсан нотлох зүйл, дүнд үндэслэн “Монгол Улсыг 2021-2025 онд хөгжүүлэх таван жилийн үндсэн чиглэл” 67.7 хувьтай хэрэгжсэн гэж дүгнэв. Мөн үндсэн чиглэлийг хууль тогтоомжид заа­сан шаардлагын дагуу боловсруулаагүй нь төлөв­лөсөн хугацаанд бүрэн хэрэгжихгүй байхад нө­лөөл­сөн гэжээ. Улмаар гүйцэтгэлийг боди­той үнэлэхэд хүнд­рэл учруулж, нийгэм, эдийн за­саг, байгаль орч­ны тогтвортой хөгжилд үзүүлэх үр нөлөөг буу­руулс­ныг танилцуулсан юм. 
Түүнчлэн Монгол Улсыг хөгжүүлэхээр то­дорхойлсон зорилго, зорилт, арга хэмжээний хүрээнд 2021-2024 онд нийт 21.7 их наяд төгрөг зарцуулсан ч нийгэм, эдийн засагт ямар эерэг өөрчлөлт бий болсон нь тодорхойлогдохгүй байгааг дүгнэлтэд онцоллоо. Аудитын дүгнэлтэд үндэслэн Үндэсний аудитын газраас Монгол Улсын хөрөнгө оруулалтын хөтөлбөрт тусгах төсөл, арга хэмжээнд хууль, журам, аргачлалд заасны дагуу судалгаа, тооцоо, үнэлгээг иж бүрэн хийх зөвлөмж хүргүүлсэн байна.

Ч.Болор