АШУҮИС-ийнхан Туршилтын мэс заслын төв нээв

Анагаахын шинжлэх ухааны үндэсний их сургууль (АШУҮИС)-ийн оюутнууд практик туршлага муутай, хүүхэлдэй чагнасаар төгсдөг гэх шүүмжлэл бий. Тэгвэл тус сургуулийнхан мэс заслын эмчээр бэлтгэгдэж буй оюутнуудад зориулан туршилтаар хагалгаа, ажиллавар хийх боломжтой төв байгуулснаа өчигдөр нээлээ. Туршилтын мэс заслын төв нь практикт суурилсан, амьтанд мэс засал хийх боломжтойгоороо давуу талтай гэнэ.
АШУҮИС-ийн Мэс заслын тэнхимийн 80 жилийн ой энэ онд тохиож буй. Үүнтэй холбоо­тойгоор Ботаникт байрлах салбар сургуульдаа дээрх төвийг байгуулжээ. Мэс засалч болоход олон жилийн туршлага, ур чадвар шаарддаг ч хүний эд, эрхтэнд дадлага хийх боломжгүй учраас оюутнууд дуураймал орчинд суралцах шаард­лагатайг тус сургуулийн багш нар он­цолж байв. 
Туршилтын мэс заслын төвийг олон улсын стандартын дагуу тохижуулж, шаардлагатай тех­ник төхөөрөмжөөр хангажээ. Нээлтийн үеэр АШУҮИС, зарим эмнэлгийн мэс заслын багууд гахайн элгийг туршилтаар тайрах, ясны бэртэл гэмтлийг “эмчлэх” зэрэг хэд хэдэн ха­гал­гаа хийж үзүүлсэн нь олны анхаарлыг та­тав. Элэг шилжүүлэн суулгах эмчилгээг эх орон­­доо нутагшуулсан эмч нар ч мөн гадаа­дад мэр­гэ­жил дээшлүүлж ирээд гахайнд туршил­тын мэс заслууд хийж, туршлагажсан байдаг. Иймд ирэх жилээс тус төвд бөөр шилжүүлэн суулгах бо­лон цээж, хэвлийн хөндийн хагалгааг тур­шил­таар хийх сургалтын орчин бүрдүүлэх аж.

О.Ундрах