Парисын олимпын нээлтийн ёслол Улаанбаатарын цагаар долдугаар сарын 26-наас 27-нд шилжих шөнийн 01:30 цагт эхэлнэ. Өмнө жилүүдийн нээлт цэнгэлдэх хүрээлэнд болдог байсан бол энэ удаа Сена мөрнөөр завьтай хөвөн явах юм. Усан онгоцны зогсоолууд үзэгчдийн байрлах хэсэг болох бөгөөд нийт 600 мянга орчим үзэгчийг хамруулах тооцоо бий.
Ёслолын парад Парисын түүхэн дурсгалт газруудаар өнгөрч, орон орны тамирчдыг суулгасан завьт парад Аустерлицийн гүүрнээс аяллаа эхэлнэ. Сена мөрний эрэг дагуу зургаан км замыг туулах юм. Парис хотын Нотр Дамын сүм, Луврын музей, Напалоеоны бунхан байрлах Les Invalides цогцолбор, Grand Palais музейн цогцолбор зэрэг Парис хотын түүхэн дурсгалт газруудаар явна. Завьт парад Эйфелийн цамхагийн эсрэг талын замд хүрэлцэн ирсний дараа олимпын бамбараа асааж, “Парис-2024” олимп эхэлснийг албан ёсоор зарлах юм. Олимпын нээлтэнд 206 Үндэсний олимпын хорооны 10 500 орчим тамирчин оролцох аж.
Олимпын хамгийн том нээлт гэж нэгэнт нэрлэгдээд буй тус үйл ажиллагаанд Монгол улсаас хөнгөн атлетикийн нэрт тамирчин Б.Сэр-Од, анхны Олимпдоо оролцож буй боксын залуу тамирчин О.Есүгэн нар улсынхаа тугийг мандуулах бол АНУ-аас домогт сагсчин Леброн Жэймс, Косовогаас эгч дүү жүдогийн тамирчин Гжакова, Грекээс NBA-ийн супер од Яннис Антетокунмпо нар улсынхаа тугийг мандуулах аж. Энэхүү түүхэн нээлт монголын цагаар долдугаар сарын 26-27-ны шилжих шөнө болох бөгөөд Central tv, Premier Sports Network сувгуудаар дамжуулагдах юм байна.
