Өнөөдөр гадаа -10 градусын хүйтэн байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Арванхоёрдугаар сарын 27-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 361 дэх өдөр бөгөөд он дуусахад 4 хоног үлдлээ.
- Цаг агаар өдөртөө -10 хэмийн хүйтэн бол шөнөдөө -22 градус хүйтэн байх нь ээ.
- Билгийн тооллын 16, Хэрцгий охин одтой, шарагчин хонь өдөр. Буд гараг. Өдрийн наран 8 цаг 41 минутад мандан, 17 цаг 05 минутад жаргана. Тухайн өдөр гахай, туулай жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эм, эмнэлгийн элдэв үйл, хагалгаа хийлгэх, биеийн тамирыг сэргээх, угаал үйлдэх, мал худалдан авах, мал түгээх, огторгуйн үүдийг боох, их хүмүүнтэй уулзахад сайн. Сахил санваар авах, хануур, төөнүүр хийлгэх, балгадын суурь тавих, нохой худалдан авахад муу. Өдрийн сайн цаг нь бар, туулай, могой, бич, нохой, гахай болой. Хол газар яваар одогсод зүүн хойш мөрөө гаргавал зохистой. Үс шинээр үргээлгэх буюу засуулахад тохиромжгүй.
- Валют арилжааны төвд ам.долларын авах ханш 3404.00 төгрөг, зарах нь 3424.00 төгрөг байна. Харин рублийн авах ханш 37.20, зарах ханш 37.60, юанийн авах ханш 475.00, зарах ханш 479.60, вонийн авах ханш 2.60, зарах ханш 2.62 төгрөг байна.
Өнөөдөр болох онцлох үйл явдлууд:
- 12.00 цагт Туурган хивсний дэргэдэх студид УИХ-ын гишүүн, ЭЗБХ-ны дарга Ц.Цэрэнпунцаг, Монголбанкны ерөнхийлөгч Б.Лхагвасүрэн нар хэвлэлийн хурал хийж эдийн засгийн нөхцөл байдал, мөнгөний бодлогын хэрэгжилт, банк санхүүгийн салбарын гол үйл явдлууд, эрх зүйн шинэчлэл, ГВАН, гадаад өрийн нөхцөл байдал, алтны нөөц гэх зэрэг хамгийн сүүлийн мэдээллүүдийг нэгдсэн байдлаар танилцуулна.
- Улаанбаатар дахь Русский Дом 11.00 цагаас РЦНК-ийн байрандаа хэвлэлийн бага хурал зарлаж байна. Хэвлэлийн хурлаар ОХУ-д Засгийн газрын тэтгэлгээр суралцаж буй оюутнуудын тухай, ирэх жилд суралцах боломж, Монголын алтан хоолойтнууд ОХУ-ын нэр хүндтэй олон уралдаанд амжилт үзүүлсэн, орчин үеийн техникээр тохижуулж тус бүр 120 сая төгрөгийн өртгөөр бүтсэн орос хэлний кабинетуудын тухай гэх мэт 2023 онд хийсэн ажлуудынхаа талаар танилцуулна.
- 10.00 цагт УИХ-ын ажлын хэсгийн болон байнгын хороодын хурал болно. Засгийн газрын ээлжит хуралдаан болно.
- 10.00 цагт Богд хааны ордон музейд Үндэсний эрх чөлөө, тусгаар тогтнолоо сэргээн мандуулсны 112 жилийн ойд зориулсан “Монголын тусгаар тогтнол ба үндэсний эв нэгдэл” эрдэм шинжилгээний хурал эхэлнэ.
- 11.30 цагт “ЗМ”-ний мэдээллийн төвд. “Иргэн та ХҮЧ” залуусын санаачилгаас УИХ-ын ээлжит сонгуулийн тойргийг бүсчилж хийхээр болсонтой холбоотойгоор хэвлэлийн бага хурал зарлажээ.
Энэ өдөр дэлхийн түүхэнд:
- 2009 онд Ираны сонгуулийн жагсаал: Ираны Тегеран хотноо сонгуулийн дүнг эсэргүүцсэн жагсагчдын өөдөөс гал нээжээ.
- 2007 онд Пакистаны экс ерөнхий сайд Benazir Bhutto буудлагын үеэр алагджээ.
- 1997 онд Протестант парламентын удирдагч Billy Wright Их Британийн Хойд Ирландад алагджээ.
