Өнөөдөр гадаа 32 хэм дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Зургаадугаар сарын 13-ны өдөр
Өглөөд заавал мэдэж байх ёстой зүйлүүд:
1. Өнөөдөр бол жилийн 164 дахь өдөр юм. Мөн он дуустал 201 өдөр үлдэж байна.
2. Цаг агаар өдөртөө 32 хэмийн дулаан бол шөнөдөө 11 хэм дулаан байх нь ээ.
3. Билгийн тооллын 25, Эм найруулах, эхнэрийг дуудах, үс авах, элчид эд өгөх зэрэгт сайн. Түүнд төрсөн хүмүүн хоёр хоног есөн сард үл үхвээс их хилэнцтэй, баялаг, яриа ихтэй, сэтгэл муутай, жараас ная хүрч наслана гэж номлосон. Өвчин болвол арав хоногт амирлана. Замд гарвал сайн бөгөөд эд, идээ арвижна. Хулгайд алдвал зүүнээс ирсэн хоёр хүмүүн хулгайлаад хойшоо одсон, эд түүнийхээ төлөө маргалдаад нэгэн нь эргүүлж тушаана. Зүүн нүд татвал хэрүүл тэмцэл болно. Баруун нүд татвал эд хувцас олно. Зүүн чих хангинавал жуулчин ирнэ. Баруун чих хангинавал муу гаслан ирнэ. Нохой уливал халуун болохуй ба хэрээ дуугарвал муу хэл дуулна. Тагнай эрвэгнэвэл хэн нэгэн үхнэ. Бие таталзвал гэнэтийн жуулчин ирнэ. Шилбэ татвал үхлийн гэм ирэх нигууртай гэж номлосон. Үс шинээр үргээлгэх буюу засуулахад нүд бүрэлзэн улцайна.
4. Манай улсын голлох валют болох ам.долларын ханш авах нь 3435.00, зарах нь 3442.00 төгрөгтэй тэнцэж байгаа бол бусад валют болох рубль авах нь 41.00, зарах нь 41.40, харин юань авах нь 482.00, зарах нь 485.00, вон авах нь 2.63, зарах нь 2.65 төгрөг байна.
Өнөөдөр болох онцлох үйл явдлууд:
- 08.30 цагт Удирдлагын академид: “Олон нийтийг гамшгийн эрсдэлийг буруулахад чиглэсэн мэдээллээр хангах, гамшгийн үед сэтгүүлчид хэрхэн ажиллах” сэдэвт Үндэсний сургалт, семинарыг НҮБ, мэдээллийн МОНЦАМЭ агентлаг, Удирдлагын академи зохион байгуулж байна.
- 09.00 цагт “Шангри-Ла” зочид буудалд: “Тогтвортой санхүүжилтийн долоо хоног-2023” эхэлж байна. Эхний үйл ажиллагаа болох Дэлхийн банкны бүлгийн гишүүн Тогтвортой банк, санхүүгийн байгууллагуудын холбоо (SBFN), Хүлэмжийн хийн тооцоолол, санхүүгийн бүртгэлийн түншлэл (PCAF), “Голомт” банктай хамтарсан “Уур амьсгалын эрсдлийн удирдлага, Тогтвортой санхүүгийн замын зураг боловсруулах” сургалт болно.
- 09.00 цагт Төрийн ордонд: “Алтай дамнасан тогтвортой байдлын яриа хэлэлцээ-Жендэрийн эрх тэгш байдал ба тогтвортой хөгжил” олон улсын чуулга уулзалт болно. НҮБ-ын ерөнхий нарийн бигчийн дарга асан Бан Ги Мун оролцож байна.
- 10.00 цагт УИХ-ын Ажлын хэсэг, байнгын болон түр хороод хуралдана.
- 10.00 цагт “Элексир” кофед: (Д.Сүхбаатарын талбай, МҮЭ-үүдийн холбооны байрны хажууд) “ТЭГШ ТӨЛӨӨЛӨЛ” захидлын аяны уулзалт болж, 2000 захидлыг УИХ-ын гишүүдэд хүргүүлэх талаар мэдээлнэ.
- 11.00 цагт НОБГ-т: Нийслэлийн хэмжээнд үер ус, гол, усны ослын нөхцөл байдал, урьдчилан сэргийлэх арга хэмжээний талаар мэдээлнэ. Утас: 9910-7367.
- 11.30 цагт “ЗМ” сонины мэдээллийн төвд: “Хилийн чанад дахь Монголчуудын зөвлөл” ТББ, “Цахим Өртөө” холбоо, Гадаадад төгсөгчдийн нэгдсэн зөвлөл хамтран гадаадад суугаа 200,000 гаруй иргэдийг төлөөлөх УИХ-ын гишүүнтэй болохыг шаардсан #БидТөлөөлүүлэхЭрхтэй аяныг зарлана.
- 14.00 цагт ХХААХҮЯ-нд: Монголын Үйлдвэрлэлийг дэмжих холбооноос БНХАУ-ын Манжуур, Хайлаар хотод Монголын үйлдвэрлэгчдийн нэрийн барааны дэлгүүрийг нээж буй талаар мэдээлнэ. Утас: 7011-8668, 9903-5951.
Энэ өдөр дэлхийн түүхэнд:
1. Өнөөдөр бол Унгарын Зохион бүтээгчдийн өдөр.
2. 1988 оны энэ өдөр АНУ-ын жүжигчин Cody Walker мэндэлжээ. Тэрээр "Галзуу хурд" цувралын гол дүрүүдийн нэг Паул Уолкерын дүү бөгөөд "Галзуу хурд 7" кинонд ахынхаа гүйцээж чадаагүй хэсгүүдийг орлон тогложээ.
3. 2015 онд Техаст цагдаагийн газрын гадна нэгэн залуу шалтгаангүйгээр гал нээж, үүнийхээ дараа өөрөө цагдаа нарт буудуулж нас баржээ.
4. 2000 онд Өмнөд Солонгосын ерөнхийлөгч Ким Дэжун Хойд Солонгосын удирдагч Ким Чэн Иртэй БНАСАУ-ын нийслэл хотод уулзжээ.
5. 2000 онд Итали улс Туркийн алуурчин Mehmet Ali Ağca-д өршөөл үзүүлжээ. Тэрбээр 1981 онд Жон Паул пап ламын амь насыг хөнөөхөөр завдаж байжээ.
