Барилга, хот байгуулалтын сайдын ээлжит шуурхай хуралдаан 2022.06.06-ны өдөр боллоо. Хуралдааны эхэнд газар, хэлтсүүдийн өнгөрсөн 14 хоногийн гүйцэтгэл, хэрэгжүүлсэн ажлуудыг яамны Нийтийн аж ахуй, инженерийн дэд бүтцийн бодлогын хэрэгжилтийг зохицуулах газрын дарга Г.Цогтсайхан танилцууллаа.
Мэдээллийн дараа яамны Хяналт шинжилгээ, үнэлгээ дотоод аудитын газрын дарга Л.Идэрцогт газар хэлтсүүдийн ажлын гүйцэтгэл, үнэлгээг танилцуулж, хагас жилийн тайланд тусгаж, анхаарах шаардлагатай ажлуудын талаар нэмэлт мэдээлэл өглөө.
Мөн Газар зохион байгуулалт, геодези, зураг зүйн газрын дарга А.Энхманлай Говь-Алтай аймагт болсон салбарын зөвлөгөөнөөс гарсан асуудлууд, газрын багц хуулийн төслийг өргөн барихад бэлэн болсон талаарх мэдээллийг танилцуулав.
Сайд Б.Мөнхбаатар "1008" орон сууцны хорооллын барилгын ажил, цэвэрлэх байгууламжуудын шинэчлэл, норм, нормативын баримт бичгийн боловсруулалт, цементийн үйлдвэрлэл, барилгын материалын үнийн индекс болон магадлалын ажлуудыг тодруулж, нэмэлт мэдээлэл сонслоо.
Шуурхай хуралдааны төгсгөлд Барилга, хот байгуулалтын сайд Б.Мөнхбаатар яамны газар хэлтэс, харьяа байгууллагуудын удирдлагуудад дараах үүрэг даалгаваруудыг өглөө.
Үүнд:
- Ногоон нуур орчмын "1008" орон сууцны хорооллын барилгын ажлыг яаралтай эхлүүлэх,
- Геодезийн хуулийн төслийг нарийвчлан танилцуулах
- Гадны хөрөнгө оруулалт, зээл, тусламжаар хэрэгжих төслүүд дээр ажлын хэсэг байгуулж, ажлын явцыг түргэтгэх
- Барилгын материалын үнийн өсөлтийг тооцож, магадалал хийх 1142 ажлыг яаравчилж дуусгахыг салбарын сайд үүрэгдлээ.
Өнгөрсөн жил Засгийн газраас гэр хорооллын дахин төлөвлөлтийн хүрээнд хэрэгжих “Ногоон нуур 1008 айлын орон сууц” төслийн бүтээн байгуулалтын бэлтгэл ажил бүрэн хангасан хэмээн мэдээлж байсан. Гэвч Коронавирус цар тахлын улмаас өнөөдрийг хүртэл хойшлуулсан гэх. Сүхбаатар дүүргийн 9-р хороо Ногоон нуур 1008 айлын орон сууц” төслийг БНХАУ-ын Засгийн газраас Монгол Улсын Засгийн газарт олгох 350 сая юанийн буцалтгүй тусламжийн хөрөнгөөр хэрэгжүүлэх юм. Төслийн бүтээн байгуулалтын ажлын хүрээнд нийт 84833,6м2 талбай бүхий 21 давхар,зоорьтой, найман блок барилга барина. Мөн авто зам, авто зогсоол, ногоон байгууламж, 960 хүүхдийн сургууль, 240 хүүхдийн цэцэрлэгийн барилга ч төлөвлөжээ.
