Төрийн албаны шинэтгэлийн нэг томоохон алхам бол төрийн албаны хууль тогтоомж, чадахуйн зарчмын хэрэгжилтийн талаар төрийн байгууллагын үйл ажиллагаанд хүний нөөцийн аудит хийхээр хуулиар зохицуулалттай билээ.
Төрийн албаны зөвлөлөөс 2022 онд хэрэгжүүлэх хүний нөөцийн аудитын төлөвлөгөөг баталж түүний дагуу улсын бүртгэлийн байгууллага хүний нөөцийн үйл ажиллагаандаа чадахуйн зарчмыг хэрэгжүүлж байгааг үнэлж дүгнэх, төрийн албаны шинэтгэл, хүний нөөцийн менежмент, төрийн албаны чадавхыг бэхжүүлэх чиглэлээр арга зүйн дэмжлэг үзүүлэх зорилготой хүний нөөцийн аудитыг эхлүүллээ.
Төрийн албаны зөвлөлийн гишүүн С.Цэдэндамбаар ахлуулсан ажлын хэсэг эхний ээлжид Улсын бүртгэлийн ерөнхий газарт ажиллаж байгаа бөгөөд тус байгууллагын удирдах ажилтнууд уулзалтад оролцож, Салбар зөвлөлийн гишүүд, аймаг, нийслэл, дүүргийн улсын бүртгэлийн хэлтсийн дарга нар цахимаар оролцлоо.
Уулзалтаар төрийн албаны шинэтгэлийн хүрээнд хэрэгжүүлж байгаа үйл ажиллагааны талаар мэдээлэл хийж, Төрийн албаны зөвлөлийн даргын шийдвэрээр батлагдсан аудитын баг, ажлын удирдамж, аудит хийх стандарт, аудитын хугацаа, холбогдох бусад асуудлыг танилцуулав. Мөн Монгол Улсын бүртгэлийн байгууллагын үйл ажиллагаа, түүхэн хөгжил, орчин үеийн технологийг бүртгэлийн ажиллагаанд хэрэглэн төрийн үйлчилгээг цахимжуулж байгаа талаар холбогдох албан тушаалтнуудтай ярилцаж, мэдээлэл солилцлоо.
