Өнөөдөр гадаа 16 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
5 дугаар сарын 21-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 141 дахь өдөр бөгөөд он дуусахад 224 хоног үлдлээ.
- Цаг агаар өдөртөө 16 хэмийн дулаан бол шөнөдөө 5 градус дулаан байх нь ээ.
- Билгийн тооллын 29, Гоё хүүхэн одтой, хөх хулгана өдөр. Өдрийн наран 5 цаг 06 минутад мандан, 20 цаг 31 минутад жаргана. Тухайн өдөр бич жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлийг эхлэх, дээдсээс халамж хүсэх, лам хувраг болох, багш шавьд барилдах, номын абшиг авах, шинэ гэр ба байр авах, гарагийг тахих, хүүхэд үрчлэн авах, урлан бүтээхэд сайн. Улаа гаргах, хиншүү хярвас гаргах, төлгө тавих, морь уралдахад муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар одогсод зүүн урагш мөрөө гаргавал зохистой. Үс шинээр үргээлгэх буюу засуулахад тохиромжгүй.
- Манай улсын голлох валют болох ам.долларын ханш 2807.00 төгрөгтэй тэнцэж байгаа бол бусад валют болох рубль 39.20, юань 395.00, вон 2.26 төгрөг байна.
Өнөөдөр болох онцлох үйл явдлууд:
- 10.00 цагт ГХЯ-нд НҮБ-ын Ази, Номхон далайн эдийн засаг, нийгмийн комиссын 76 дугаар чуулганы нээлтийг Гадаад харилцааны сайд Д.Цогтбаатар даргалан хуралдуулна. Хуралдаанд дэлхийн 54 орны төлөөлөгч цахимаар оролцоно.
- 11.00 цагт Эрүүл мэндийн яамнаас коронавирусний асуудлаар цахимаар мэдээлнэ.
- 11.40 цагт МҮХАҮТ-д тус танхим, Монголын ажил олгогч эздийн нэгдсэн холбоо, Баялаг бүтээгчдийг дэмжих холбоо, "Монголоо шинэчилье" клуб "ДЭЛХИЙН ДУНДАЖ ОРЛОГОТОЙ МОНГОЛ ХҮН" үндэсний санаачилга гаргаснаа танилцуулна.
Энэ өдөр дэлхийн түүхэнд:
- Өнөөдөр Чили улсад Усан цэргийн өдөр тохиож байна.
- 1989 оны энэ өдөр Шинэ Зеландын жүжигчин, дуучин Emily Robins мэндэлжээ.
- 2012 онд Бүгд Найрамдах Йемен Улсын нийслэл Сана хотод нэгэн амиа золиослогч бөмбөг дэлбэлснээс болж 120 гаруй хүн амь насаа алджээ.
- 2011 онд АНУ-ын Радио нэвтрүүлэгч Harold Camping уг өдрөөс таван сарын дараа дэлхийн төгсгөл ирнэ хэмээн зөгнөж байжээ.
- 1998 онд Майамид нэгэн халдагч үр хөндөлтийн таван эмнэлэгт тосны хүчил асгаж, их хэмжээний хохирол учруулж байжээ.
- 2001 онд Францын "Taubira" хууль батлагдав. Энэ нь Атлантын боолын худалдаа, боолчлолыг хүн төрөлхтний эсрэг гэмт хэрэг хэмээн албан ёсоор хүлээн зөвшөөрч байгаа хэрэг юм.
- 2005 онд дэлхийн хамгийн өндөр галзуу хулгана болох "Kingda Ka" нь АНУ-ын Нью-Жерсид орших "Six Flags Great Adventure" паркад нээлтээ хийжээ.
