Өнөөдөр гадаа -14 градусын хүйтэн байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
1 дүгээр сарын 14-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 14 дахь өдөр бөгөөд он дуусахад 351 хоног үлдлээ.
- Цаг агаар өдөртөө -14 хэмийн хүйтэн бол шөнөдөө -23 градус хүйтэн байх нь ээ.
- Билгийн тооллын 19, Бага морь одтой, улаан луу өдөр. Өдрийн наран 8 цаг 38 минутад мандан, 17 цаг 24 минутад жаргана. Тухайн өдөр хулгана жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр худалдаа арилжаа хийх, бизнэс эхлэх, хүү сангийн эх хатгах, эд агуурс авах, зээл авах, арвижуулах, дэлгэрүүлэх үйлийг эхлэх, хишиг даллага дуудуулах, насан бүтээл хийлгэх, зэтгэрийг номхотгох, хөгжмийн зэмсэг урлахад сайн. Гүүр тавих, газар ухах, эрдэнийг гадагш өгөхөд муу. Өдрийн сайн цаг нь бар, луу, могой, бич, тахиа, гахай болой. Хол газар яваар одогсод зүүн урагш мөрөө гаргавал зохистой. Үс шинээр үргээлгэх буюу засуулбал “Сайн нөхөртэй учирах” хэмээх сайн.
- Манай улсын голлох валют болох ам.долларын ханш 2748.00 төгрөгтэй тэнцэж байгаа бол бусад валют болох рубль 45.20, юань 399.00, вон 2.38 төгрөг байна.
Өнөөдөр болох онцлох үйл явдлууд:
- 09.00 цагт “Холидэй Инн” зочид буудалд Барилгын зураг төслийн экспертүүдийн чуулган болно. Утас: 91119757, 88311212
- 10.30 цагт “Үндэсний мэдээллийн төв”-д ахмадууд Байгалийн баялагийн тэгш шударга хуваарилах түр хороо байгуулах талаар мэдээлнэ. Утас: 95693928
- 11.00 цагт “Пума Империал” зочид буудалд сэтгүүлчийг тагнасан хэргийн талаар МСНЭ-ийн Ерөнхийлөгч Х.Мандахбаяр мэдээлнэ.Утас: 90109907, 99736725
- 11.00 цагт Нийслэлийн иргэний танхимд Hийслэлийн цагдаагийн удирдах газраас олон нийтэд 2019 оны ажлын тайлангаа танилцуулна. Утас: 99995504
- 11.30 цагт Эрчим хүчний зохицуулах хорооны гадна талбайд Шарын голын уурхайчдын төлөөлөөгч нар эрчим хүчний салбарын удирдлагуудын хууль бус үйлдлийн талаар мэдээлнэ.
- 11.30 цагт Сонгинохайрхан дүүргийн 20 дугаар хороонд тус дүүргийн Эмэгтэйчүүдийн хөгжлийн төвийн нээлт болно. Утас: 99127029
Төрийн ордонд
- 10.00 цагт “Их Эзэн Чингис хаан” танхимд Байгаль орчин, хүнс, хөдөө аж ахуйн байнгын хороо хуралдана.
- 11.00 цагт “Жанжин Д.Сүхбаатар” танхимд Төрийн байгуулалтын байнгын хороо хуралдана.
Энэ өдөр дэлхийн түүхэнд:
- 2011 онд Арабын хавар: Тунисийн ард иргэд засаглалаа эсэргүүцэж бослого гаргасны дараа тус улсын Ерөнхийлөгч Зине Эль Абидин Бен Али эх орноосоо дүрвэж, Саудын Араб улсад ирэв.
- 2010 онд Йемений Засгийн газар Аль-Кайда террорист бүлэглэлийн эсрэг дайн зарлаж байгаагаа мэдэгдлээ.
- 2004 онд Гүрж улс одоогийн "таван загалмай" бүхий далбааг хэрэглэхээр баталжээ. Энэ нь тус улсын түүхэнд 500 жил мандуулсан далбааг өөрчилсөн тохиолдол болсон юм.
- 1973 онд Алдарт дуучин Элвис Преслигийн тоглолтыг телевизээр шууд дамжуулсан нь нэг уран бүтээлчийн тоглолтыг хамгийн их хүн үзсэн нэвтрүүлэг болж телевизийн урлагийн түүхэнд бичигджээ.
- 1972 онд Данийн хаан ширээнд хатан хаан II Маргарет суув. Тус улс 1412 оноос хойш анхны хатан хаанаа өлгийдөн авсан юм.
- 1960 онд Австралийн нөөцийн банк буюу төв банк байгуулагджээ.
- 1952 онд Америкийн NBC сувгаар олон жил цацагдсан "Өнөөдөр" өглөөний мэдээллийн хөтөлбөрийг Дейв Гарровей эхлүүлсэн байна.
