Японд төрийн айлчлалаар ирсэн АНУ-ын Ерөнхийлөгч Дональд Трамп өнөөдөр /2019.05.27/ Японы эзэн хаан Нарухитотой уулзжээ. Наран улсын он цагийн шинэ тоолол буюу Рэйвагийн эринд эзэн хаантай уулзсан анхны гадаадын төрийн тэргүүн болж түүхэнд бичигдсэн талаар NHK телевиз дамжууллаа. Эзэн хаан болон АНУ-ын Ерөнхийлөгч нар юуны тухай чрьсан нь одоогоор тодорхойгүй байна. Уулзалтын дараа Японы Эзэн хаан хүндэт зочдоо хүндэтгэлийн зоогт урьсан бөгөөд АНУ-ын Ерөнхийлөгч тун таатай буйгаа илэрхийлсэн байна.
Тус улсад дөрөв хоногийн айлчлал хийж буй Доналд Трамп ням гарагт сумо бөхийг үзэж сонирхож төрүүлсэн бөх Асаноямад “United States President’s Cup” цомыг анх удаа гардуулжээ. Түүний дараа Ерөнхий сайд Абэ Шинзо, Дональд Трамп нар Токио хотоос зүүн зүгт орших Тиба мужийн “Mobara Country Club”-ын талбайд хамтдаа гольф тоглосон байна.
Тэд гольфын хорхойтнууд бөгөөд тав дахь удаагаа хамт тоглосон нь энэ аж. Орой нь Ерөнийлөгч Ерөнхий сайд хоёр гэргий нарын хамтаар Япон үндэстний зоогийн газар орж Японы өвөрмөц хоолуудыг идэж үзжээ.
Трампын дараагийн уулзалт Японы Акасака ордны Төрийн зочны өргөөнд болох бөгөөд Японы Улсын Ерөнхий сайд Абэ Шинзотой ордны ёслолд оролцон, зоог барьж, улмаар хамтарсан хэвлэлийн бага хурал хийх юм байна.
