Хоёр жилийн өмнө "Амазон" компанийн үүсгэн байгуулагч Жеф Безос дэлхийн хамгийн баян эрхмүүдийн жагсаалтыг олон жил тэргүүлсэн "Microsoft" компанийн үүсгэн байгуулагч Билл Гейтсийг ардаа орхисон билээ. Түүний хөрөнгө одоогоор 90.6 тэрбум ам.доллараар үнэлэгдэж байна. Иймд бид "Дэлхийн хамгийн баян эрхэм"-ийн тухай сонирхолтой 10 баримтыг нь дэлгэн танилцуулж байна.
1. Эзэнт гүрний эхлэл жижиг гаражаас
Амазоны эзэнт гүрэн нь анх байгуулагдахдаа тэнгэрээс буугаад ирсэн юм шиг хүчирхэг байсангүй. 1994 онд Жеф Безос нь интернет худалдааны сайт бүхий компаниа өөрийн гараждаа байгуулж байжээ. Тэрбээр энэ бизнесээ эхлэхдээ онлайнаар ном худалдаалж, хожмын эзэнт гүрнээ байгуулах сууриа тавьсан байна.
2. Техасын фермерчин хүү
Безосын өвөг дээдэс нь Техас мужид их хэмжээний газар эзэмшдэг байжээ. Тэрбээр багаасаа Котулла хотын ойролцоо өвөөгийнхөө 25 мянган акр газар бүхий нэгэн эдлэн газарт амьдардаг байжээ. Багаасаа өвөөдөө фермерийн аж ахуй эрхлэхэд тусалдаг байсан тухай тэрбээр хожим нь ярьж байв.
3. Тэр "Вашингтон Пост" сониныг эзэмшдэг
Дэлхийн ихэнх тэрбумтнууд өөрийн гэсэн хувийн жижиг, том хэвлэл мэдээллийн хэрэгсэлтэй байдаг. Тэгвэл Безос ч мөн ялгаагүй өөрийн сонинтой аж. 2013 онд тэрбээр алдарт Вашингтон Пост сонинг 250 сая ам.доллараар худалдан авчээ. Зарим хүмүүс түүнийг өрсөлдөгч компаниудынхаа рейтингийг унагаах зорилгоор сэтгүүлчдээрээ захиалгат нийтлэл бичүүлдэг хэмээн шүүмжилдэг.
4. Агуу бизнесмэн
Жеф Безос нь Форбес сэтгүүлээс жил бүр тодруулдаг "Дэлхийн хамгийн агуу 50 бизнесмэн" жагсаалтыг 3 жил дараалан тэргүүлжээ.Түүнчлэн 2012 онд тус сэтгүүлээс түүнийг "Оны бизнесмэн"-ээр тодруулж байв.
5. Безос музейд амьдардаг
Тэрбээр 2016 онд Вашингтоны Калорама дүүрэгт байрлах нэхмэл эдлэлийн музейг 23 сая ам.доллараар худалдан авч байжээ. 1912 онд байгуулагдсан тус музей нь АНУ-ын Үндэсний түүхийн газруудад бүртгэлтэй аж. Ташрамд дурдахад, Калорама дүүрэг нь Америкийн нэртэй улс төрийн зүтгэлтнүүдийн амьдран суурьшдаг элит хэсэг бөгөөд Жеф Безос нь Барак Обама, Доналд Трамп нарын хөрш ажээ.
6. Стар Трек киноны "улаан фэн"
Безос Стар Трек киноны улаан фэн ажээ. Тэрбээр Алекса системийг бүтээхдээ тус киноноос санаагаа авсан гэдэг.
7. Сансрын компанийн "босс"
Безос "Blue Origin" хэмээх пуужин бүтээх төсөл хэрэгжүүлж буй тухайгаа сүүлд хэвлэлд ярьжээ. Энэ төсөл амжилттай хэрэгжвэл олон улсын хэмжээнд сансрын аяллын зардлыг багасгахад ихээхэн нөлөө үзүүлэх юм байна. Ингэснээр шинэ үеийн сансрын түүхэнд томоохон дэвшил болох нь дамжиггүй.
8. Хоёр пиццаны дүрэм
Зайлшгүй шаардлагатай уулзалтыг тэр цомхон хүрээнд хийдэг. Цөөхөн хүнтэй, үр дүнтэй уулзалтыг чухалчилдаг тэрбээр үүнийгээ “хоёр пиццаны дүрэм” хэмээн нэрлэдэг. Хоёр пиццанд цадахааргүй олон хүнтэй нэг дор хэзээ ч уулздаггүй гэнэ.
9. Powerpoint-оор хийсэн presentaition-нд дургүй
Тэрбээр Powerpoint-оор хийсэн илтгэл, тайланд дургүй нэгэн аж. Бүр байгууллагын хэмжээнд powerpoint ашиглахыг хоригложээ. Түүнчлэн тайлан, төсөл таницуулах гэж байгаа ажилтнуудаасаа үргэлж зургаагаас дээш хуудас материал шаарддаг гэнэ. Хэрэв та Амазонд ажилд орохыг хүсвэл бичих чадвараа сайжруулаарай гэж зөвлөе.
10. Тэр дор хаяж 8 цаг унтдаг
Безос амжилтанд хүрэхийн тулд үргэлж оройн цагаар ажилладаг гэнэ. Тэрбээр 8 хүртэлх цаг унтдаг бөгөөд үүнийгээ амьдралынхаа хэвшил болгож чаджээ. Түүнд өглөө босоход сэрүүлэг шаардлагагүй.
