Өнөөдөр гадаа 30 хэм дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Зургаадугаар сарын 20-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 172 дэх өдөр юм. Мөн он дуустал 194 өдөр үлдэж байна.
- Цаг агаар өдөртөө 30 хэмийн дулаан бол шөнөдөө 12 хэм дулаан байх нь ээ.
- Билгийн тооллын 2, долоон улаан мэнгэтэй, шарагчин тахиа өдөр. Янаг амрагтайгаа учрахуй хийгээд абшиг авахуй, ус гатлахуй, угаал үйлдэхүй тэргүүнд сайн. Түүнд төрсөн хүмүүн хоёр хоног, далан хоёр хоног ба найман сард эс үхвээс хилэнцэт сэтгэлтэй, чалчаа өгүүлэгч, эд өчүүхэнтэй, урлахуй хийгээл огоорохуй арганд мэргэн, насны доод хэмжээ нь жар гарюу гэж номлосон. Өвдвөл арван хоногт анюу. Замд гарвал идээ ундаа, хувцас, чимэг олдох нигууртай. Баруун нүд татвал садан төрөл ирэх, зүүн нүд татвал баясгалангийн хурим болно. Баруун чих хангинавал гаслан болох ба зүүн чих хангинавал алдаж, бүрэлгэхийг үзэх болно. Нохой уливал хэрүүл маргаан болох ба хэрээ дуугарвал жуулчин ирнэ. Тагнай эрвэгнэвэл аймшиг гарах болно. Бие татвал хэрүүл маргаан хийгээд уйтгарлахуй үг дуулна. Үс засуулах буюу авхуулбал хэл ам, хэрүүл тэмцэл ирнэ.
- Манай улсын голлох валют болох ам.долларын ханш авах нь 3435.00, зарах нь 3450.00 төгрөгтэй тэнцэж байгаа бол бусад валют болох рубль авах нь 40.10, зарах нь 41.70, харин юань авах нь 482.50, зарах нь 483.50, вон авах нь 2.67, зарах нь 2.75 төгрөг байна.
Өнөөдөр болох онцлох үйл явдлууд:
- 10.00 цагт: Төрийн ордонд: Онцгой байдлын байгууллагын 19 жилийн ойг тохиолдуулан Монгол Улсын Ерөнхийлөгч У.Хүрэлсүх төрийн одон, медаль гардуулна.
- 10.00 цагт: УИХ-ын ажлын хэсэг болон байнгын хороод хуралдана.
- 11.00 цагт: "Монгол ньюс” мэдээллийн төвд: Дэлхийн өрсөлдөх чадварын төв болон Эдийн засгийн бодлого, өрсөлдөх чадварын судалгааны төвөөс “Дэлхийн өрсөлдөх чадварын жилийн тайлан 2023”-г танилцуулна.
- 11.00 цагт: Д.Сүхбаатарын талбайд: Онцгой байдлын албаны өдөрлөг болно.
- 11.30 цагт: НОБГ-т: Онцгой байдлын байгууллагын 19 жилийн ойн баярын хурал болно. Энэ үеэр НОБГ-ын шинэ байрны нээлт болон “Онцгой байдал эрхэлсэн анхны сайдын нэрэмжит шагнал”-ыг гардуулах ёслол болно. Утас:8615-0069.
- 11.30 цагт: Нийслэлийн Баянгол дүүрэгт үүсээд буй засаглалын хямралтай холбоотойгоор тус дүүргийн ИТХ-ын АН-ын бүлгээс мэдээлэл хийнэ. Утас: 9918-2536.
Энэ өдөр дэлхийн түүхэнд:
- 451: Ромын эзэнт гүрэн Хүн нарын их хаан Атиллын эсрэг шийдвэрлэх томоохон тулааныг хийжээ. Энэхүү тулааныг түүхэнд Чалонс талын тулаан хэмээн тэмдэглэн үлдээжээ.
- 1840: Зохион бүтээгч Самуэль Морз өөрийн нээлт болох телеграфын патентаа авч байжээ.
- 1877: Александр Грэхэм Белл Дэлхийн анхны телефон утасны үйлчилгээг Канадын Онтарио хотноо нээжээ
- 1900: Оросын ШУ-ы академийн “Оросын туйлын экспедиц” Санкт-Петурбург хотоос “Заря” хэмээх уурын хөдөлгүүрт дарвуулт хөлгөөр аяллын гараагаа эхлүүлэв. Экспедиц алдарт Санниковын газрыг хайх зорилготой байсан гэдэг.
- 1944: Герман улс туршилтын V-2 загварын пуужинг амжилттай хөөргөжээ. Пуужин 176 км өндөрт хүрсэн явдал нь хүн төрөлхтний түүхэн дэх хүний гараар хийсэн бүтээл гадаад сансарт хүрсэн анхны тохиолдол байв.
- 1990: Ангараг гаргийн тойрог замд орших бага гараг Эврикаг нээв.
- 1992: Тува улсад ОХУ-аас тусгаар тогтнох тухай бүх нийтийн санал асуулга явуулах талаар иргэдийн гарын үсэг цуглуулж эхэлсэн.
