Өнөөдөр гадаа 9 хэм дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Тавдугаар сарын 2-ны өдөр
Өглөөд заавал мэдэж байх ёстой зүйлүүд:
- Өнөөдөр жилийн 122 дахь өдөр юм. Мөн он дуустал 243 өдөр үлдэж байна.
- Цаг агаар өдөртөө 9 хэмийн дулаан бол шөнөдөө 6 хэм хүйтэн байх нь ээ.
- Билгийн тооллын 12, Ангараг гараг. Харцага одтой, цагаан бич өдөр. Өдрийн наран 5 цаг 33 минутад мандан, 20 цаг 05 минутад жаргана. Тухайн өдөр хулгана, луу жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлийг эхлэх, дээдсээс халамж хүсэх, лам хувраг болох, багш шавьд барилдах, номын абшиг авах, шинэ гэр ба байр авах, хараал, жатхыг буцаах, бүжиг наадам хийх, цэцэрлэг байгуулах, хур оруулах, дархны үйлд сайн. Хувцас эсгэх, шинэ хувцас өмсөх, зөвлөгөө хийхэд муу. Өдрийн сайн цаг нь хулгана, үхэр, луу, могой, хонь, нохой болой. Хол газар яваар одогсод зүүн зүгт мөрөө гаргавал зохистой. Үс шинээр үргээлгэх буюу засуулахад тохиромжгүй.
- Манай улсын голлох валют болох ам.долларын ханш авах нь 3473.00, зарах нь 3480.00 төгрөгтэй тэнцэж байгаа бол бусад валют болох рубль авах нь 41.80, зарах нь 42.20, юань авах нь 502.00, зарах нь 503.50, вон 2.62, зарах нь 2.64 төгрөг байна.
Өнөөдөр болох онцлох үйл явдлууд:
- 10.00 цагт Төрийн ордонд: УИХ-ын байнгын хороод хуралдана.
- 11.40 цагт “Чингис хаан”-ы музейд Үндэсний бичиг үсгийн баярын нээлт болж, “Монгол үндэстэн” үзэсгэлэн нээгдэнэ.
- 11:30 цагт Налайх дүүрэгт 50 хүүхдийн цэцэрлэгийн барилгын нээлт болно. Тус цэцэрлэгийн барилгын ажлыг Турк улсын олон улсын хамтын ажиллагааны байгууллага ТИКА сургуулийн өмнөх боловсролын үйлчилгээний хүртээмжийг нэмэгдүүлэх зорилгоор санхүүжүүлжээ. Утас: 9155-5564.
- 12.00 цагт Хууль зүйн Үндэсний хүрээлэнд: Хэвлэлийн эрх чөлөөний өдрийг тохиолдуулан МСНЭ-ээс салбарын шагнал, гишүүний үнэмлэх, энгэрийн тэмдэг гардуулах үйл ажиллагаа болно. Утас: 9111-8403.
- 15.30 цагт Туркийн хамтын ажиллагааны ТИКА байгууллага Баянгол дүүргийн ЖДҮ-ийг дэмжих төвд усалгааны болон агааржуулалтын системтэй өвлийн хүлэмж барьж байгуулсныг танилцуулна.
- 18.00 цагт СТӨ-нд Монгол Улсын Соёл Урлагийн Их Сургуулийн сургалт, эрдэм шинжилгээ, уран бүтээлийн "МОНГОЛ ЭРДЭНЭ-2023" нэгдсэн тоглолт болно.
Энэ өдөр дэлхийн түүхэнд:
- 1194 - Английн хаан I Ричард Портсмут хотод Эзэн хааны дүрмийг тогтоожээ.
- 1536 - Английн хатан хаан Анна Болейныг гэр бүлээс гадуур харилцаатай, эх орноосоо урван тэрсэлж, хар шид ашигласан гэх үндэслэлээр баривчлан хорив.
- 1568 - Шотландын хатан хаан Мери Лох Левений шилтгээнээс оргожээ.
- 1611 - Английн нийслэл Лондон хотод хаан Жеймсийн санаачилгаар Библи судрыг анх удаагаа англи хэлээр хэвлэв.
- 1691 - Халхын Түшээт хан Чахундорж, Өндөр гэгээн Занабазар тэргүүтэй Халх дөрвөн аймгийн 550 лам ноёд, Өвөр Монголын дөчин есөн хошуудын ноёд Дол нуурын чуулган дээр Манж чин улсад Халхын хант улс дагаар оров.
- 1808 - Хойгийн дайн: Мадридын партизанууд Францын эзлэн түрэмгийллийн эсрэг бослого дэгдээжээ. Алдарт зураач Франциско де Гойа "1808 оны Тавдугаар сарын 2" зургандаа энэ үйл явдлыг дүрсэлсэн байдаг.
- 1812 - Мексикийн тусгаар тогтнолын дайн: Хосе Мариа Морлелос и Павоноор удирдуулсан Мексикийн босогчид Куаутла хотыг орхин зугтав. Уг хотыг Феликс Мариа Каллехагаар удирдуулсан Испанийн цэргүүд 72 өдрийн турш бүсэлсэн юм.
- 1829 - Английн тэнгисийн цэргийн ахмад Чарльз Фремантл "Челленжер" хөлгийн зангууг Австралийн эрэгт хаясанаар "Хунт нуурын колонийг" байгуулжээ.
- 1863 - Америкийн иргэний дайн: Эх газрын армийн хошууч генерал Стөүнуолл Жексон Канцелорсвиллийн тулаанд шархдав. Шархадсанаас хойш найман өдрийн дараа амиа алджээ.
