Гуравдугаар сарын 23-ны өдөр. Цаг агаар, зурхай, валютын ханш гээд таны энэ өдрийн ажилд хэрэгцээтэй мэдээллийг хүргэе. Өдрийг сайхан өнгөрүүлээрэй.
Өглөөд заавал мэдэж байх ёстой зүйлүүд:
- Өнөөдөр бол жилийн 82 дахь өдөр бөгөөд он дуусахад 283 хоног үлдлээ.
- Цаг агаар өдөртөө 3 хэмийн дулаан бол шөнөдөө 7 хэм хүйтэн байх нь ээ.
- Билгийн тооллын 2, шийдэм одтой, цагаан луу өдөр. Тухайн өдөр хулгана, бич жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр найз нөхдийг түшиж, элдэв үйлийг түргэн бүтээх, бүтээл туурвил эхлэх, бизнес эхлэх, цар ихтэй үйлийг эхлэх, бясалгал хийх, доодсыг асран, өглөг хандив өргөх, угаал үйлдэх, бороо хур оруулах, зэтгэрийг номхотгох, хөгжмийн зэмсэг урлах, дархны үйлд сайн. Гүүр тавих, газар шороо ухахад муу. Модон хохимой өдөр. Үс шинээр үргээлгэх буюу засуулахад муу.
- Манай улсын голлох валют болох ам.долларын ханш авах нь 3528.00, зарах нь 3531.00 төгрөгтэй тэнцэж байгаа бол бусад валют болох рубль авах нь 44.90, зарах нь 45.30, юань авах нь 514.00, зарах 515.00 , вон авах 2.70, зарах нь 2.71 төгрөг байна.
Өнөөдөр болох онцлох үйл явдлууд:
-
10.00 цагт: УИХ-ын чуулганы нэгдсэн хуралдаан болно.
-
10.00-15.00 цагт: МҮХАҮТ-д: Монгол-Оросын бизнес форум болно. Утас:9191-9396.8076-8073.9411-0375.
-
10.00-12.00 цагт: Тусгаар тогтнолын ордны “Сошиал хаус”-т: Эрүүл мэндийн сэтгүүлчдийн "Цагаан үзэг" холбоо Сүрьеэтэй тэмцэх дэлхийн өдрийн хүрээнд Монгол Улс дахь сүрьеэгийн нөхцөл, байдлын талаар ХӨСҮТ-ийн Сүрьеэгийн тандалт, судалгааны албатай хамтран уулзалт зохион байгуулна. Утас: 9910-6580, 9914-9247.
-
11.00 цагт: АН “4/11 мэдээллийн цаг”-аар тус намын шинээр томилогдсон намын дэд дарга, нарийн бичгийн дарга нарыг танилцуулна. Мөн хүний эрхийн асуудал, инфляц, цалин тэтгэвэрийн асуудлаар мэдээлэл хийнэ. Утас:9100-0017.
-
11.00 цагт: “Монгол ньюс” мэдээллийн төвд: Хөгжлийн банкны сонсголтой холбогдуулан Б.Жаргалсайханы Бүгд найрамдах намаас мэдээлэл хийнэ.
-
16.30 цагт: Улаанбаатар дахь Русский Домд (хуучнаар Оросын шинжлэх ухаан, соёлын төв)-д "Ворота в Азию" олон улсын 37 дахь удаагийн үзэсгэлэн нээгдэнэ. Үзэсгэлэнгийн хүрээнд “Здравствуй,Россия” нэртэй VR платформын нээлт болно.
-
17.30 цагт: “Степпе Арена” мөсөн өргөөнд: Монгол Улсын Ерөнхийлөгчийн ивээл дор болох Дэлхийн хоккейн аварга шалгаруулах тэмцээний нээлтийн ёслолын үйл ажиллагаа болно.
Энэ өдөр дэлхийн түүхэнд:
- 1568 онд Францы улсын шашны хоёрдугаар дайн Лонжүмэгийн гэрээнд гарын үсэг зурснаар дуусчээ.
- 1775 онд Америкийн иргэний дайн: АНУ-ын Виржиниа мужийн Ричмонд хотын Гэгээн Жоны сүмд Патрик Хенри алдарт "Надад эрх чөлөө эсвэл үхэл өг" гэсэн үгээ хэлэв.
- 1801 онд Оросын хаан I Павелыг Гэгээн Павелийн ордонд унтаж байхад нь жадлан хөнөөжээ.
- 1857 онд АНУ-ын Нью-Йорк хотын Уоллстритийн санхүүгийн байранд Элиша Отисийн зохион бүтээсэн цахилгаан шатыг суурилуулжээ.
- 1888 онд Английн хөлбөмбөгийн лигийн анхны тоглолт зохион байгуулагдав. Тус тэмцээн нь дэлхийн хөлбөмбөгийн спортын түүхэнд хамгийн удаан хугацааны турш зохион байгуулагдаж байгаа тэмцээн билээ.
- 1905 онд Грек улсад Крит арлыг нэгтгэх "Теризо"-гын хувьсгал эхлэв.
- 1909 онд АНУ-ын ерөнхийлөгч асан Теодор Рүүзвельт Нью-Йорк хотоос гарч Африк тивийг зорих аялалдаа гарав. Түүний аялалыг Үндэсний газар зүйн нийгэмлэг болон Смитсонианы хүрээлэн санхүүжүүлжээ.
- 1933 онд Германы Рейхстаг хууль баталж, Адольф Гитлерыг дарангуйлагч болгожээ.
- 1956 онд Пакистан улс Исламын бүгд найрамдах улсыг тунхаглаж, албан ёсоор тусгаар тогтнов.
- 1978 онд НҮБ Ливанд энхийг сахиулах ажиллагаа зохион байгуулахаар болж цэнхэр дуулгатнууд Бейрутэд иржээ.
- 1996 онд Тайван улсад ерөнхийлөгчийн анхдугаар ардчилсан сонгууль болж Лий Тенг-Хуй ерөнхийлөгч болжээ.
