Өнөөдөр гадаа 9 хэм хүйтэн байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
1 дүгээр сарын 11-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 11 дахь өдөр бөгөөд он дуусахад 354 хоног үлдлээ.
- Цаг агаар өдөртөө 9 хэмийн хүйтэн бол шөнөдөө 21 хэм хүйтэн байх нь ээ.
- Билгийн тооллын 19, бага морь одтой, шаргачин могой өдөр. Тухайн өдөр үхэр, тахиа жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр элдэв үйлд хянуур хандах хэрэгтэй ба ан гөрөө хийх, мал адгуус муулах, сүм дуганыг сэргээх, газар лусын зан үйл хийх, өр барагдуулах, буг дарах, газрын ам бооход сайн. Ургаа мод таслах, газрын ам нээх, гөлөг тэжээх, байшингийн суурь тавих, угаал үйлдэхэд муу. Үс шинээр үргээлгэх буюу засуулбал сайн нөхөртэй учирна хэмээжээ.
- “Найман шарга” валют арилжааны төвд ам.долларын авах ханш 3468.00 төгрөг, зарах нь 3475.00 төгрөг байна. Харин рублийн авах ханш 48.00, зарах ханш 48.80, юанийн авах ханш 510.50, зарах ханш 513.00, вонийн авах ханш 2.81, зарах ханш 2.83 төгрөг байна.
Өнөөдөр болох онцлох үйл явдлууд:
-
09:00 цагт “Блью Скай” зочид буудалд агаарын тээвэр, аялал жуулчлалыг хөгжүүлж, аялал жуулчлалын тур оператор компаниудыг дэмжин ажиллахаар МИАТ ТӨХК болон Монголын аялал жуулчлалын холбоо санамж бичиг үйлдэх уулзалт болно.
-
09.30 цагт Засгийн газрын ээлжит хуралдаан болно.
-
10.00 цагт Нийслэлийн "Хангарди" ордонд нийслэлийн удирдах ажилтнуудын шуурхай зөвлөгөөн болно.
-
12.00 цагт “Монгол Ньюс” мэдээллийн төвд Монголын хүүхдийн спортын зуны VII наадмын хөтөлбөрт ороогүй самбо бөх, дугуй, хүндийн өргөлт, буудлага, гимнастик, даамын спортын холбоодын төлөөлөл хэвлэлийн бага хурал хийнэ.
-
12.00-14.00 цагт “UB Grand” зочид буудалд “Үг хэлэх, үзэл бодлоо илэрхийлэх эрх чөлөө-Олон улсын хэм хэмжээ, Монголын нөхцөл байдал” сэдэвт дугуй ширээний уулзалт болно. Утас: 8901-7101.9918-6068.
Энэ өдөр дэлхийн түүхэнд:
- 1972 онд Зүүн Пакистан нэрээ Бангладеш болгон өөрчилж, тусгаар тогтнолоо зарлав.
- 1957 онд Сенегалын нийслэл Дакар хотноо Африкийн зөвлөл байгуулагдав.
- 1943 онд Дэлхийн хоёрдугаар дайн: АНУ болон Их Британийн арми Хятад улсад газар нутгийн эрхийг нь буцаан олгов.
- 1942 онд Дэлхийн хоёрдугаар дайн: Япончууд Куала-Лумпурыг эзлэн авсан.
- 1935 онд Амелиа Эрхарт Калифорни мужаас Хавай хүртэл нисч хүрсэн анхны хүн болов.
- 1922 онд Дэлхийн эрүүл мэндийн практикт анх удаагаа чихрийн шижнээр өвчилсөн хүнд инсулинийг ашиглаж эхлэв.
- 1908 онд АНУ Их хавцлыг үндэсний дархан цаазат газарт бүртгэн, аялал жуулчлалыг хөгжүүлэн, дурсгалын цогцолбор байгуулах шийдвэр гаргав.
