Өнөөдөр гадаа 23 хэм дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Тавдугаар сарын 26-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 146 дахь өдөр бөгөөд он дуусахад 219 хоног үлдлээ.
- Цаг агаар өдөртөө 23 хэмийн дулаан бол шөнөдөө 5 хэм дулаан байх нь ээ.
- Билгийн тооллын 26, Дэлгэрүүлэгч одтой, шаргагчин туулай өдөр. Тухайн өдөр гахай жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул аливаа үйлд хянамгай хандаж, биеэ энхрийлүүштэй. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба угаал үйлдэх, мал аж ахуйн үйл, удирдлагын суудалд суух, огторгуйн үүдийг боох, их хүмүүнтэй уулзахад сайн. Газар хагалах, ус булгийн эх малтах, балгадын суурь тавих, нохой худалдан авахад муу. Үс шинээр үргээлгэх буюу засуулбал жаргал үргэлжид ирэх сайн хэмээжээ.
- Манай улсын голлох валют болох ам.долларын ханш авах нь 3126.00, зарах нь 3130,00 төгрөгтэй тэнцэж байгаа бол бусад валют болох рубль авах нь 52.00, зарах нь 52.60, харин юань авах нь 470.50, зарах нь 472.00, вон авах нь 2.51, зарах нь 2.53 төгрөг байна.
Өнөөдөр болох онцлох үйл явдлууд:
- 9.00 цагт Сангийн яам, Татварын ерөнхий газар, УИХ-ын дэргэдэх Төсвийн тогтвортой байдлын зөвлөл, Татварын мэргэшсэн зөвлөхийн нийгэмлэг зэрэг мэргэжлийн байгууллагууд нэгдэж “Тогтвортой хөгжилд татварын боловсролын үүрэг” үндэсний анхдугаар зөвлөгөөнийг “Новотел” зочид буудалд зохион байгуулна.
- 9.30 цагт Глоб интернэшнл төв Нээлттэй нийгэм форумын дэмжлэгээр хэрэгжүүлж буй "Төрийн мэдээллийн ил тод байдлын мониторинг, үзэл бодлоо илэрхийлэх эрх чөлөөг хамгаалах" төслийн хүрээнд “Нийтийн мэдээллийн ил тод байдлын тухай хуулийн хэрэгжилт ба кейсэд суурилсан уулзалт” “Пума империал” зочид уудалд болно.
- 11.00 цагт Махчин шувуудын үхэл хорогдлыг багасгахаар Эрчим хүчний яам, Эрчим хүчний зохицуулах хороо, Эрчим хүчний зураг төсөл зохиогчдын холбоо, Барилга хот байгуулалтын яам, Цахилгаан түгээх компаниудын удирдлага, мэргэжилтэн, инженер, судлаач, олон улсын донор, байгаль хамгаалах төрийн бус байгууллагуудын төлөөллийг оролцуулсан MNS 6518:2015 стандартын нэмэлт өөрчлөлтийг танилцуулах уулзалт “Corporate” зочид буудалд болнно. Утас: 88151511, 88315011
- 11.00 цагт "Ээж ээ, Та чадна аа" эмэгтэйчүүдийг дэмжих хөтөлбөрийн хүрээнд зохион байгуулж буй "Ээж" гэрэл зургийн үзэсгэлэнгийн нээлт “B” Контемпорари арт галерейд болно. "Ээж" үзэсгэлэн нийт 20 гаруй ээжийн амьдралын түүхийг харуулсан гэрэл зургуудаас бүрдэх бөгөөд уран бүтээлч Э.Ононгуагийн "Нөмөр" үзэсгэлэнгийн бүтээлүүдээс хүргэнэ. Утас: 88007074
- 11.00 цагт Монголын үндэсний морин уралдаан, уяачдын холбооноос “Монгол ньюс” мэдээллийн төвд мэдээлэл хийнэ.
- 13.00 цагт Эмээлт дэх мах бэлтгэлийн газарт хийсэн лабораторийн шинжилгээний талаар НМХГ мэдээлэл хийнэ. Утас: 99176798, 92018188
Энэ өдөр дэлхийн түүхэнд:
- Өнөөдөр Данийн вант улсын Фредерик Хунтайжийн төрсөн өдөр тохиож байна.
- Мөн өнөөдөр Польш улсад Ээжүүдийн баяр тохиож байгаа юм байна.
- 1972 онд Виландра үндэсний цэцэрлэгт хүрээлэн Австралид нээгджээ.
- 2008 онд БНХАУ-д болсон хүчтэй үерийн улмаас 148 хүн амь насаа алдаж, 1.3 сая иргэнийг нүүлгэн шилжүүлж байжээ.
