Баянзүрх дүүргийн Татварын хэлтсийн нэр бүхий албан тушаалтнууд эрх мэдэл албан тушаалаа урвуулан ашиглаж, өөрсдийгөө шагнасан, төсвийн хөрөнгийг үр ашиггүй зарцуулсан хэрэгт НПГ-аас яллах дүгнэлт үйлдэн шүүхэд шилжүүллээ. Тус хэлтсийн даргын албан үүргийг түр орлон гүйцэтгэгч асан Ж.Гансүх гэх эмэгтэй удирдлага дороо ажиллаж байсан албан тушаалтнуудтай хамт уг хэрэгт холбогджээ. Тодруулбал, дээрх эмэгтэй болон тус хэлтсийн Захиргааны тасгийн даргын үүрэг гүйцэтгэгч Д.Булганчимэг нар төсвийн хөрөнгийг зориулалтын бусаар зарцуулж, Төрийн албан хаагчид шагнал, урамшуулал олгох журмыг зөрчин гэрээт болон үндсэн ажилтан олон хүнийг шагнаад, тэндээсээ багагүй хэсгийг нь буцаан авч ашигласан нь АТГ-ынхны шалгалтаар тогтоогджээ.
Тэд 2018 оны арванхоёрдугаар сарын 20-нд А/90 дугаартай “Шагнал урамшуулал олгох тухай” тушаал гаргаж, дэд даргын үүрэг гүйцэтгэгч Б.Золтуяа, Захиргааны тасгийн даргын үүрэг гүйцэтгэгч, өдгөө Чингэлтэй дүүргийн Татварын хэлтэст ажиллаж буй Д.Булганчимэг, Хувь хүний татварын тасгийн даргын үүрэг гүйцэтгэгч Ю.Лувсанцэрэн нарт тус бүр 20 сая төгрөгийн урамшуулал олгосон аж. Мөн үйлчлэгч П.Оюунцэцэг, орон тооны бус байцаагч М.Цэрэнчимэд, Х.Алтанбагана, И.Өлзиймаа, С.Сүглэгмаа, Т.Төмөрбаатар, Э.Ариунсанаа, татвар хураагч З.Сүхбаяр, Эрсдэл, статистикийн тасгийн компьютерын инженер А.Нармандах нарт тус бүр гурван сая, татвар хураагч Н.Энхмаа, Татвар төлөгчтэй харилцах тасгийн даргын үүрэг гүйцэтгэгч Ц.Эрдэнэхүү, Татварын хяналт, шалгалтын тасгийн даргын үүрэг гүйцэтгэгч Б.Батсүх, Эрсдэл, статистикийн тасгийн даргын үүрэг гүйцэтгэгч А.Батжаргал, Татварын орлогын тасгийн даргын үүрэг гүйцэтгэгч Г.Сүрэнтамжид нарт тус бүр дөрвөн сая төгрөгийг урамшуулал хэмээн өгчээ. Улмаар Ю.Лувсанцэрэнгээс 15, П.Оюунцэцэг, М.Цэрэнчимэд, Х.Алтанбагана, З.Сүхбаяр, И.Өлзиймаа, С.Сүглэгмаа, Т.Төмөрбаатар, Э.Ариунсанаа, А.Нармандах нараас тус бүрээс нь 2.5, Н.Энхмаагаас 3.4, Ц.Эрдэнэхүү, Б.Батсүх нараас тус бүр 2.7, А.Батжаргал, Г.Сүрэнтамжид нараас тус бүрээс нь гурван сая нэг зуун тавин мянга гээд нийт 52.6 сая төгрөгийг байгууллагын шинэ жил болон аяны арга хэмжээнд зарцуулна хэмээн буцаан авсан байна. Үүнээсээ зургаан саяыг нь шинэ жилдээ зарцуулж, 12.5 саяар нь Ю.Лувсанцэрэн, Ц.Эрдэнэхүү, Б.Батсүх, А.Батжаргал, Г.Сүрэнтамжид нарыг шагнан, 34.1 саяыг нь Ж.Гансүх хувьдаа завшсан хэмээн буруутгагдаж буй аж.
Баянзүрх дүүргийн Татварын хэлтсийнхэн байсхийгээд л эрүүгийн хэрэгт холбогддог. Дээрх даргаас өмнө тус хэлтсийн Татварын хяналт, шалгалтын тасгийн даргын үүргийг түр орлон гүйцэтгэгч асан, дээрх урамшууллаас дөрвөн саяыг хүртсэн Б.Батсүх тэргүүтэн 2020 онд АТГ-ынханд шалгуулсан билээ. Тэрбээр найз Н.Хүрэлбаатартайгаа хамтран 2020 оны нэгдүгээр сард “Сохомон” ХХК-ийн нягтлан бодогч С.Жавхлангаас тав, мөн оны хоёрдугаар сард “Best shoes” ХХК-ийн захирал Б.Түвдэнням, нягтлан бодогч Л.Хишигдэлгэр нараас 30.6, “Шилдэг шилтгээн” ХХК-ийн нягтлан бодогч Н.Одгэрэлээс 35 сая төгрөгийн хахууль авсан хэрэгт холбогдсон юм. Б.Батсүхтэй хамт Баянзүрх дүүргийн Татварын хэлтсийн татварын улсын байцаагч Ч.Сугар, О.Энхтуяа нарыг шалгасан бөгөөд “Best shoes” ХХК-д татварын хяналт шалгалт хийснийхээ дараа Б.Батсүхээр дамжуулан хахууль өгөхийг шаардсан хэрэгт буруутгагдсан. Түүнчлэн Б.Батсүх нь Төрийн албаны зөвлөлийн Ажлын албаны Сонгон шалгаруулалтын газрын шалгалтын цахим систем хариуцсан референт М.Алтанбаганад хахууль өгснийг АТГ-ын мөрдөгчид шалгалтаараа тогтоосон байдаг.
Бэлтгэсэн: Г.Равжаа
