Монгол Улсын дээд шүүхийн нийт шүүгчийн 2022 оны дөрөвдүгээр сарын 18-ны өдрийн хуралдаанаар Эрүүгийн хууль болон Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслийн талаарх Эрүүгийн хэргийн танхимын саналыг үндэслэн дээрх хуулиудад нэмэлт, өөрчлөлт оруулах төслийн үзэл баримтлал, үндэслэл, тайлбарыг бүлэг, зүйл, хэсэг тус бүрээр хэлэлцэж, тогтоол баталж, хууль санаачлагчид хүргүүлэхээр боллоо.
Эрүүгийн хууль болон Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөлд санал авахаар Хууль зүй дотоод хэргийн яамнаас Монгол Улсын дээд шүүхэд 2022 оны гуравдугаар сарын 31-ний өдөр албан бичиг ирүүлсэн юм.
Дашрамд дурдахад, Монгол Улсын шүүхийн тухай хуулийн 25 дугаар зүйлийн 25.8.3, 26 дугаар зүйлийн 26.1 дэх хэсгүүдэд заасны дагуу Улсын дээд шүүхийн бүрэн эрхэд хуульчлагдсан хэрэг хянан шийдвэрлэх ажиллагааны журам болон шүүхийн үйл ажиллагаа, эрх зүйн байдалтай холбогдсон хууль тогтоомжийн төслийн талаарх саналаа хууль санаачлагчид хүргүүлэх асуудлыг Нийт шүүгчийн хуралдаанаар анх удаа хэлэлцсэн байна.
