Нүүрсний эрэлт 2022 онд түүхэн дээд хэмжээнээсээ давж магадгүй. Үүний сацуу 2021 онд дэлхийн нүүрсний үйлдвэрлэлийн өсөлт есөн хувьд хүрч мэдэхийг Олон улсын эрчим хүчний агентлагийн (ОУЭА) энэ сарын тайланд дурджээ. “Эдийн засгийн хурдацтай сэргэлт нь энэ онд дэлхийн хэмжээнд нүүрснээс цахилгаан эрчим хүчний үйлдвэрлэх үзүүлэлт дээд түвшинд хүрч, эл түүхий эдийн эрэлт 2022 онд дээд амжилт тогтоож магадгүй” гэж уг баримт бичигт дурдсан байна. Байгалийн хийн үнийн өсөлтөөс шалтгаалан нүүрсээр ажилладаг цахилгаан эрчим хүчний өрсөлдөх чадвар нэмэгдсэн. Тиймээс энэ онд дэлхий даяар нүүрсний эрэлт, тэр дундаа зөвхөн цахилгаан эрчим хүч төдийгүй цемент, гангийн үйлдвэрүүдийн хэрэглээ зургаан хувиар өснө. “Энэ өсөлт 2013, 2014 онд хүрсэн дээд амжилтаас хэтрэхгүй ч цаг агаарын нөхцөл байдал, эдийн засгийн өсөлтөөс хамааран нүүрсний эрэлт 2022 онд бүх цаг үеийн дээд хэмжээнд хүрч магадгүй” гэж тайланд бичсэн байна.
Өнгөрсөн онд дэлхийн нүүрсний эрэлт 4.4 хувиар буурсныг ОУЭА-ийн мэргэжилтнүүд тодруулсан. Эл түүхий эдийн эрэлт АНУ, Европын Холбоонд хамгийн их буюу бараг 20, Энэтхэг, Өмнөд Африкт найман хувиар буурсан аж.
