Өнөөдрийн тухай таны мэдэх ёстой 21 зүйл: Маврикий улсын хөлбөмбөгийн шигшээ баг манай улсын багтай нөхөрсөг тоглолт хийнэ

3 дугаар сарын 27-ны өдөр

Өглөөд заавал мэдэж байх ёстой зүйлүүд:

1. Өнөөдөр бол жилийн 86 дахь өдөр бөгөөд он дуусахад 279 хоног үлдлээ.
2. Цаг агаар өдөртөө 8 хэмийн дулаан бол шөнөдөө 3 градус дулаан байх нь ээ. Харин өдөртөө ялимгүй хур тунадас орох гэнэ.
3. Билгийн тооллын 11, нэг цагаан мэнгэтэй шар морь өдөр. Өнөөдөр үсээ авахуулах буюу засуулбал эрхтэн хурц болох гэнэ. Энэ өдөр бар, нохой жилтнээ аливаа үйлийг хийхэд эерэг сайн, бич, тахиа жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна
4. Манай улсын голлох валют болох ам.долларын ханш 2397.00 төгрөгтэй тэнцэж байгаа бол бусад валют болох рубль 42.40, юань 381.00, вон 2.22 төгрөг байна.

Өнөөдөр болох онцлох үйл явдлууд: 

1. Улсын бүртгэлийн ерөнхий хууль, Хуулийн этгээдийн улсын бүртгэлийн тухай хуулийн шинэчилсэн найруулгын төслийн хэлэлцүүлэг Хууль зүйн үндэсний хүрээлэнгийн “Хуульчдын танхим”-д 09.00 цагаас болно. 
2. Нийслэлийн Нийтийн биеийн тамир спортын хороотой хамтарсан багш дасгалжуулагчдын анхан шатны сургалт 09.00-13.00 цагийн хооронд БЗД-ийн Монгол тэмүүлэл сургууль дээр болно.
3. Цэнгэг усны нөөц, байгаль хамгаалах төвөөс 14.00 цагаас "Монгол Өрх Торлог үндэсний хөгжлийн шийдэл" сэдэвт уулзалтыг зохион байгуулна.
4. Хөдөлмөр, Нийгмийн Хамгааллын Яамны 10-н давхрын хурлын танхимд 09.30-12.00 цагт Дэлхийн банкнаас хийсэн “Монгол Улсын хөдөлмөрийн зах зээл дэх жендэрийн тэгш бус байдал” чанарын судалгааны үр дүнг танилцуулна. 
5. “Давсны хэрэглээг 5 грамм хүртэл багасгах 5 арга” мэдээлэл, сурталчилгааны долоо хоногийн хүрээнд СБД, 10 дугаар хороо, 7-р хороолол, Гүн шим сургалтын төвд 09.30 цагт “Хоол үйлдвэрлэл, үйлчилгээний салбарын тогооч нар”-ын сургалт болно.
6. МХБХ-ны цэнгэлдэх хүрээлэнд 18.00 цагаас Маврикий (Мавритий) улсын шигшээ баг зочилж манай улсын "Талын хөх чононууд"-тай нөхөрсөг тоглолт хийнэ. 

Энэ өдөр дэлхийн түүхэнд:  

1. 1794 онд Их Британийн засгийн газар байнгийн тэнгисийн цэргийг зургаан харуулын онгоцтойгоор байгуулжээ.
2. 1871 онд регби спортын анхны олон улсын тоглолт Шотланд-Английн хооронд болж, Шотландчууд ялалт байгуулжээ.
3. 1938 онд Хятад-Японы хоёрдугаар дайн: Тайежүаны тулаан эхлэв. Энэ тулаан Хятадын ялалтаар өндөрлөсөн билээ.
4. 1964 онд Хойд Америкийн түүхэн дэх хамгийн хүчтэй газар хөдлөлт болжээ. Газар хөдлөлт 9.2 магнитудын хүчтэй байсан бөгөөд Аляск мужийн төвийн өмнөд хэсэгт 125 хүн амиа алдсан юм. Ялангуяа Аляск мужийн Анкорейж хот маш их хохирол амсчээ.
5. 1975 онд Аляскыг дундуур нь холбосон байгалийн хийн хоолойг барьж эхлэв.
6. 1977 онд дэлхийн агаарын тээврийн түүхэнд хамгийн хөнөөлтэй осол болов. Канарын арлуудын Тенериф хотын нисэх буудалд Бойнг 747 онгоц мөргөлдөж 583 хүн амиа алджээ.
7. 1981 онд Польшийн хөдөлмөрчид ажлын цагийг багасгах шаардлага тавьж, нэгдмэл хөдөлгөөн өрнүүлжээ. Жагсаалд 12 сая Польшчууд оролцсон байна.
8. 1990 онд АНУ-ын Засгийн газрын оролцоотой Марти телевизийг Куба улсад нээж Кастрогын эсрэг үзэл суртлыг дэлгэрүүлж эхэлжээ.
9. 1993 онд БНХАУ-ын даргын суудалд Жианг Земин суув.
10. 1998 онд АНУ-ын Хүнс болон эмийн хяналтын хороо бэлгийн сулралтай эрчүүдийг виагра эм уухыг хүлээн зөвшөөрчээ.
11. 2016 онд Пакистаны Лахор хотын Гулшан-е-Игдал цэцэрлэгт амиа золиослогч этгээд бөмбөг дэлбэлж 70 хүн амиа алдан, 300 гаруй хүн бэртэж гэмтжээ. Энэ нь Исламын шашинтнууд Христийн шашны эсрэг хийсэн террорист халдлага байсан юм.