“УИХ нь Засгийн газарт хариуцлага тооцож чадахгүй байна”

Эрх чөлөөний эвсэл намынхан “Засгийн га­зар огцор” жагсаалаа Д.Сүхбаатарын тал­байд өнөө­дөр 11 дэх өдрөө үргэлжлүүлж байна. Тэд­ний гол зорилго Засгийн газрыг огц­руулан, УИХ-ыг тарааж, дахин сонгууль явуулах юм. Тус намынхан уг жагсаалын хүрээнд Засгийн газ­рыг огцруулах санал гаргуулахаар УИХ-ын 33 гишүүнд албан бичиг хүргүүлээд буй. Гэвч одоо­гоор шийдвэр гаргах түвшний хүмүүс ямар нэгэн тайл­бар өгөөгүй аж. Иймд тэд маргааш болтол хариу өгөхгүй хэвээр байвал тэмцлийн хурц хэл­бэрт шилжин, өлсгөлөн зарлахаа мэдэгдлээ. 
Эрх чөлөөний эвсэл намын гишүүн Э.Одбаяр “Энэхүү жагсаалыг хийх талаар өнгөрсөн ар­ван­хоёрдугаар сарын 6-нд зарласнаас хойш Засгийн газраас нэлээд хэдэн удаа бидний эсрэг арга хэмжээ авлаа. Тэд эрх мэдлээ хадгалан үлдэхийн тулд иргэдийн үзэл бодлоо илэрхийлэх, хэвлэн нийтлэх эрхийг нухчин дарж байна. Иймд бид ажил хаялт зарлан, үзэл бодлоо илэрхийлэхийг иргэд, аж ахуйн нэгжүүдэд уриалж байгаа юм.  Эрх чөлөөний эвсэл намын гишүүд энэ сарын 22 хүртэл тайвнаар жагсана. Энэ хугацаанд Зас­гийн газраас дорвитой хариулт өгөхгүй бол бид өлс­гөлөн зарлахаар бэлтгэж буй. 
Өөрсдийгөө сөрөг хүчин гэж нэрлэсэн Үн­дэс­ний эвслийнхэн ч Засгийн газрын “бөөр”-нд хэ­дийн наадсан юм байна. Тэд элдэв түр хороо ах­лан, зарим төсөлд хамтран ажиллахаар болжээ. Мөн Бүгд найрамдах намынхан жагсаалын туршид бидний үзэл бодлоо илэрхийлэх эрхэд халдан, элдэв гүтгэлэг тарааж, үг хэлээр доромжилсон. Ер нь Монголд төрийн эрх мэдлийн хуваарилалт гэх зүйл байгүй болжээ. Засгийн газар нь УИХ-аа бүхэлд нь хянаж байна шүү дээ. Ийм нөхцөлд бид чөлөөт эдийн засаг гэх мэт сайхан амлалтын талаар бодоод ч хэрэггүй биз” гэсэн юм. 
Тус намын дарга Б.Цацрал “УИХ-ын тухай хуулийн наймдугаар зүйлийн 1.11-т УИХ-ын ги­­шүүн бүрэн эрхийнхээ хүрээнд Ерөнхий сайдыг огц­руулах санал гаргах эрхтэй. Ерөн­хий сайд ог­цорсноор Засгийн газар бүрэн бүрэл­дэ­хүүнээрээ огцордог хуультай. Тиймээс Засгийн газрыг огцруулах санал гаргуулахаар УИХ-ын 33 гишүүнд албан бичиг хүргүүлсэн. Гэтэл одоо болтол ямар ч хариу алга. Үүнээс бид төр засгийн эрх мэдлийг бүхэлд нь өөртөө төвлөрүүлэхээр юу болдгийг бодитоор нь харж байна. Тиймээс энэ данхар төсөвтэй Засгийн газрын эсрэг иргэд сөрж зогсох ёстой. Өдрөөс өдөрт доройтож буй амьдралаа хүлцэн тэвчихийн оронд сөрж, үзэл бодлоо илэрхийлэх хэрэгтэй. Өөрсдийн сон­госон УИХ-ын гишүүддээ шаардлага тавьж чад­даггүй, УИХ нь Засгийн газарт хариуцлага тоо­цож чадахгүй байна гэдэг нь дарангуйлал тог­тоож байгаагийн шинж” гэсэн юм.

У.Сүрэн