Газрын тос боловсруулах үйлдвэр барих төслийг хэрэгжүүлэх тогтоолыг батлав

УИХ-ын Аж үйлдвэржилтийн бодлогын байнгын хо­рооны энэ сарын 22-ны хуралдаанаар гурван асууд­лыг хэлэлцэн шийдвэрлэсний нэг нь газрын тос бо­ловс­руулах үйлдвэр барих төслийг хэрэгжүүлэх тог­тоолыг баталсан явдал юм. Тодруулбал, байнгын хорооны гишүүд уг төслийг хэрэгжүүлэх асуудлаар Засгийн газарт чиглэл өгөх тухай тогтоолын төслийг хэлэлцэн, баталсан байна. Тогтоолын төслийг УИХ-ын гишүүн Л.Мөнхбаясгалангийн ахалж буй “Монгол газрын тос боловсруулах үйлдвэр”-ийн бү­тээн бай­гуу­лалтад хяналт шалгалт хийх үүрэг бүхий аж­лын хэс­гийнхэн боловсруулжээ. УИХ-ын ги­шүүн Л.Мөнх­­баясгалан “Засгийн газраас БНЭУ-ын “Эк­сим” банк­наас нэмэлт зээл авах хэлэлцээрийг яарал­тай го­ри­моор соёрхон батлуулахаар УИХ-д өргөн барь­сан. Ирэх хаврын чуулганд энэ тогтоолын төслийн тай­ланг танилцуулах удирдамжтай байсан ч цаг үеийн шалт­гаанаар шуурхай боловсруулсан” гэсэн юм. 
Засгийн газарт чиглэл өгөх тухай тогтоолын тө­сөлд “Газрын тос боловсруулах үйлдвэр барих төс­лийн зардлын хяналтыг сайжруулах зорилгоор монгол мэр­­гэжилтнүүдээс бүрдсэн баг томилж, БНЭУ болон бусад улсад хэрэгжүүлж буй зураг төсөл, худалдан авалт, барилга угсралтын ажилтай танилцан, хяналт тавьж оролцуулах, “Монгол газрын тос боловсруулах үйлдвэр”-ийг тухайн жилийн төсвийн гүйцэтгэлийг хэ­лэл­цэх хугацаанд УИХ-д танилцуулж, дүгнэлт гар­ган, бүтээн байгуулалтын ажилд улсын төсвөөс нэмж санхүүжилт гаргахгүй. Мөн дотоод, гадаадаас зээл авах­гүйгээр 2028 оны нэгдүгээр улиралд баг­таан ашиг­­лалтад оруулах, үйлдвэр барих ажлын төлөв­лөгөөг жил бүрээр баталж, төлөвлөгөөний дагуу хэрэг­жүүлэх, зээлийн зарцуулалтад байнгын хяналт, үнэлгээ хийж, тухайн жилийн төсвийн гүйцэтгэлийг хэлэлцэх хугацаанд УИХ-д танилцуулах, биелэлт хангалтгүй тохиолдолд холбогдох албан тушаалтанд хариуцлага тооцох, үйлдвэрийг ашиглалтад оруулахад шаардагдах дотоодын түүхий тосооp бүрэн хангах бодлогыг хэрэгжүүлэх”-ийг үүрэг болгожээ. Түүнчлэн төслийн 2020-2024 оны бүтээн байгуулалтын ажилд гүйцэтгэлийн аудит оруулж, дүнг УИХ-д тайлагнах зэрэг арга хэмжээ авч хэрэгжүүлэхийг Засгийн газарт чиглэл болгохоор тусгасан байна. Тогтоолын төслийг хэ­рэг­жүүлэх ажлыг шуурхай зохион байгуулж, энэ талаар холбогдох байнгын хороонд, ирэх хаврын ээл­жит чуулганы хугацаанд танилцуулахыг үүрэг бол­го­сон аж.

М.Гэгээ