Дархан-Уул аймгийн БОАЖГ-ын Газар, газрын хэвлий, түүний баялгийн ашиглалт, хамгаалалт, нөхөн сэргээлт, тусгай хамгаалалттай газар, байгаль орчинд нөлөөлөх байдлын үнэлгээ , GPS мэдээллийн сан хариуцсан мэргэжилтэн Д.Баянмөнх албан тушаалаа урвуулж хахууль авсан хэргийг АТГ-ын Мөрдөн шалгах хэлтсийн мөрдөгчид шалгаж дуусжээ. Тэрбээр уг албан тушаалыг хашиж байхдаа тус аймгийн Шарын гол сумын нутагт нинжа нарын нөхөрлөлд давуу байдал олгосон хэрэгт холбогдсон аж. Тэнд бичил уурхайн чиглэлээр үйл ажиллагаа явуулж байгаа “Мөнхбаялагт хайрхан ” ЗБН нөхөрлөлийн ахлагч Д.Далайнямд давуу байдал олгож, албаны чиг үүргээ хэрэгжүүлсний хариуд 2021 оны долдугаар сард хахууль авсныг мөрдөн шалгах ажиллагаагаар тогтоосон гэнэ. Д.Баянмөнхөд холбогдох хэргийг Дархан- Уул аймгийн Прокурорын газарт хянаад албан тушаалын эрх мэдлээ хувийн ашиг сонирхлоо гүйцэлдүүлэх зорилгоор ашиглан хахууль авсан гэж үзэн Эрүүгийн хуулийн 22.4-2 дахь хэсэгт заасан Нийтийн албан тушаалтан хахууль авсан хэмээн яллах дүгнэлт үйлдэж дээрх аймаг дахь Сум дундын эрүүгийн хэргийн анхан шатны шүүхэд шилжүүлжээ.
