Өнөөдөр гадаа 5 хэмийн дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Дөрөвдүгээр сарын 24-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 114 дахь өдөр бөгөөд он дуусахад 251 хоног үлдлээ.
- Цаг агаар өдөртөө 4 хэмийн дулаан бол шөнөдөө 1 хэмийн хүйтэн байх нь ээ.
- Билгийн тооллын 4, Сумъяа гараг. Гөрөөсөн толгой одтой, хар хулгана өдөр. Өдрийн наран 5 цаг 47 минутад мандан, 19 цаг 54 минутад жаргана. Тухайн өдөр луу, бич жилтнээ аливаа үйлийг хийхэд эерэг сайн. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба угаал үйлдэх, хүүхэд үрчлэн авах, улааны үйл, хур оруулах, дархны үйлд сайн. Төлгө тавих, морь уралдахад муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар одогсод зүүн зүгт мөрөө гаргавал зохистой. Үс шинээр үргээлгэх буюу засуулбал бие эрхтний, хүч сайжирна.
- Манай улсын голлох валют болох ам.долларын ханш авах нь 3485.00, зарах нь 3492.00 төгрөгтэй тэнцэж байгаа бол бусад валют болох рубль авах нь 42.30, зарах нь 42.80, юанийн авах ханш 507.00, зарах нь 509.80, вонын авах нь 2.64, зарах нь 2.67 төгрөгтэй тэнцэж байна.
Өнөөдөр болох онцлох үйл явдлууд:
- Монгол Улсын Ерөнхийлөгч У.Хүрэлсүх, гэргий Л.Болорцэцэг нарын урилгаар Бүгд Найрамдах Польш Улсын Ерөнхийлөгч Анджей Дуда гэргий Агата Корнхаузер-Дудагийн хамт Монгол Улсад 4 дүгээр сарын 24-26-нд хийх төрийн айлчлал өнөөдөр эхэлж байна.
- 11.00 цагт Төрийн ордонд: ЦХХХ-ны сайд Н.Учрал “Шилэн” ажиллагааны хүрээнд shilen.gov.mn сайтад шинээр нээлттэй ил тод байрлуулсан мэдээллүүд болон бусад үйл ажиллагааны талаар мэдээлнэ. Утас: 9910-3830.
- 12.00 цагт С.Зоригийн хөшөөн дээр АЗХ-оос зохион байгуулж буй "Нээлттэй микрофон" арга хэмжээний хаалтын үйл ажиллагаа болно.
- 12.00 цагт УЕПГ-ын үүдэнд: Мэдээллийн зарим сайтын сэтгүүлчид ЗТХ-ийн сайдад хамаарал бүхий хэргийн холбогдох матeриалыг цуглуулснаа АТГ болон Улсын eрөнхий прокурорын газарт хүлээлгэн өгч, мэдээлэл хийнэ. Утас: 9900-8498.
- 14.00 цагт Үндэсний мэдээллийн МОНЦАМЭ агентлагийн байранд: Дэлхийн хэвлэлийн эрх чөлөөний өдрийг угтан ЮНЕСКО-гийн Монголын Үндэсний комисс, ХЭҮК, “Эмнести Интернэшнл”, “Глоб Интернэшнл” төв, МСНЭ, Хэвлэлийн хүрээлэн, Хэвлэл Мэдээллийн зөвлөл хамтарч “Сэтгүүл зүйд хүний эрхийг хангах нь” хэлэлцүүлэг зохион байгуулж байна. Утас: 7000-0160.
- 15.00 цагт: “Орд” арт галерейд: Хүүхдийн урлан бүтээх төвийн уран бүтээлч, багш Р.Энхбаяр, Г.Туяа нарын бие даасан үзэсгэлэнгийн нээлттэй.
Энэ өдөр дэлхийн түүхэнд:
- МЭӨ 1479 - Египетийн хаан ширээнд III Тутмос суув.
- 1558 - Шотландын хатан хаан Мери, Францын хунтайж Франсуатай Парисийн эх дагинын сүмд хуримлажээ.
- 1704 - Британийн эзэмшлийн Америкийн нутаг дэвсгэрт анхны хэвийн үйл ажиллагаатай "Boston News-Letter" сонин хэвлэгдэв.
- 1800 - АНУ-ын Ерөнхийлөгч Жон Адамсын санаачилгаар АНУ-ын Конгрессын номын сан байгуулагдав. Тэрээр хувийн зүгээсээ 5,000 ам.долларын хандив өргөжээ.
- 1877 - Орос-Туркийн дайн: Хаант Орос улс Оттоманы эзэнт гүрэнд дайн зарлав.
- 1895 - АНУ-ын Массачусетс мужийн Бостон хотоос дэлхийг ганцаараа завиар туулахаар Жошуа Слокум аялалаа эхлүүлжээ.
- 1913 - АНУ-ын Нью-Йорк хотод дэлхийн хамгийн анхны өндөр барилга гэгдэх Вүүлуортын барилга нээлтээ хийв.
- 1914 - Германы физикийн хүрээлэн квантын механикийн тулгуур онол гэгдэх Франк-Герцийн онолыг олон нийтэд танилцуулжээ.
- 1915 - Оттоманы эзэнт гүрэн Арменийн оюун ухаан, урлаг, үзэл санааны манлай гэгдэх 250 хүнийг баривчилсанаар Арменичуудын эсрэг цус яргалал эхэлжээ.
- 1916 - Патрик Пийрс, Жеймс Конноли нараар удирдуулсан Ирландын босогчид Британийн эзлэн түрэмгийллийн эсрэг тэмцэл өрнүүлж, улмаар Ирландыг Бүгд найрамдах улс хэмээн тунхаглав.
- 1922 - Дэлхийн түүхэнд анх удаа утасгүй цахилгаан мэдээний сүлжээг нээв. Эзэн хааны дэргэдэх утасгүй холбооны сүлжээнээс Английн Оксфордшайр хотын Лиафильд дүүргийг Египетийн Кайр хоттой холбосон цахилгаан мэдээ дамжуулсан юм.
- 1923 - Суут сэтгэл зүйч Зигмунд Фройд Вьенна хотод "Эго ба Ид" өгүүллэгийг хэвлэл. Уг өгүүлэлд хүний сэтгэл зүйг ид, эго, супер-эго гэсэн гурван зүйлд хуваажээ.
- 1926 - Берлинийн тунхагт Герман, ЗХУ гарын үсэг зурав. Уг тунхагт дурдсанаар хоёр улс ойрын таван жилийн хугацаанд бие, биендээ харилцан довтлохгүй, гаднын дайснаас хамгаална гэж тусгасан байна.
- 1953 - Их Британийн ерөнхий сайд, гарамгай улстөрч Уинстон Черчиллийг Их Британийн хатан хаан II Элизабет соёрхож, "Сир" буюу "хөлөг баатар" цол олгожээ.
- 1955 - Ази, Африкийн 29 улсын оролцсон Бандунгын бага хурал өндөрлөв. Уг хурлаар эзлэн түрэмгийлэл, арьсны үзэл, хүйтэн дайны асуудлыг хөндөн ярилцжээ.
