Хүүхдүүдэд зориулсан бүрэн хэмжээний “Nomadic adventure” танин мэдэхүйн цахим тоглоомыг НҮБ-ын Хүүхдийн сангаас гаргажээ. Гар утасны энэхүү тоглоомоор дамжуулан хүүхдүүдэд монгол ёс заншил, ахуй амьдрал, уламжлалт баяр, язгуур урлаг, газар зүйн онцлог, ан амьтдын талаарх суурь мэдлэг олгохыг зорьсонбайна. Ялангуяа хилийн чанадад амьдарч буй монгол хүүхдүүдэд өв соёлоо танин мэдэхэд нь туслах зорилготой аж. Тоглоомын агуулгыг Төрийн шагналт, түүхч, түүхийн ухааны доктор Д.Өлзийбаатарын зөвлөгөөнд тулгуурлан боловсруулсан гэнэ. Мөн тоглоомын эхлэлд Төрийн шагналт, Ардын зураач Д.Амгалангийн “Ээж ээ, сайн байна уу” бүтээлийг оюуны өмчийн зөвшөөрөлтэйгөөр дүрсжүүлэн оруулсан байна. “Марчаахай”, “Nomadic bear games” компанитай хамтран бүтээсэн уг тоглоомыг “Playstore”, “Appstore” платформоос татан авах боломжтой. Дөрвөөс дээш насныханд зориулсан эл тоглоомыг “Playstore”, “Appstore”-т энэ сарын 3-нд байршуулсан бөгөөд одоогоор 5000 гаруй хэрэглэгч татан авчээ.
Бэлтгэсэн М.Оч
